ବରଷାରେ ଗଲି ଭିଜି
ବରଷାରେ ଗଲି ଭିଜି
ଆଖି ପିଛୁଳାକେ ଧୂମାଳ ଆସିଲା
ବରଷାରେ ଗଲି ଭିଜି
ମାଟିର ବାସନା ମହ ମହ ହୁଏ
ଅଜାଣତେ ଗଲି ଖୋଜି
କେଉଁ ଆମୋଦରେ ହେଲିମୁଁ ବିଭୋର
ଭିଜୁଥିଲି ଆଖି ବୁଜି
ଆଖି ପିଛୁଳାକେ ଧୂମାଳ ଆସିଲା
ବରଷାରେ ଗଲି ଭିଜି ।
ଖୋଜି ମୁଁ ବସିଲି ମୋ ଛିଟ ଛତାକୁ
ଭିଜିଲା ନୀଳ ଲଫାପା
ଗୋଲାପୀ ଗୋଲାପୀ ଓଠର କମ୍ପନ
ଦେଲା ମୋତେ ମୃଦୁ ଚାପା
ଛିଟା ପଡିଗଲା ଦେହରେ ମୋହର
ଆନମନା ଲାଗେ ଆଜି
ଆଖି ପିଛୁଳାକେ ଧୂମାଳ ଆସିଲା
ବରଷାରେ ଗଲି ଭିଜି ।
ସତେକି କାହାର ନୀଳ ଚୁନି ମୋର
ଦେହ ଦେଲା ଅବା ପୋଛି
କାହାର କୁନ୍ତଳ ମୋ ମୁହଁରେ ପଡି
କହେ କଥା ଲୁଚି ଲୁଚି
ବରଷାକି ମୋର କଥାକୁ ବୁଝିଲା
ପ୍ରେୟସୀ କୁ କରି ରାଜି
ଆଖି ପିଛୁଳାକେ ଧୂମାଳ ଆସିଲା
ବରଷାରେ ଗଲି ଭିଜି ।