ବର୍ଷାକାଳ

ଉତ୍ତପ୍ତ ମହୀ ଶୀତଳ ପାଇ ବାରି ଧାରା

କାଳ ଆବର୍ତ୍ତନେ ଗଲା ଗ୍ରୀଷ୍ମ ତପ୍ତଖରା l

ଅତି ରମଣୀୟ ବିଜେ ଏବେ ବର୍ଷାକାଳ

ଟାଙ୍ଗର ଧରଣୀ ଦିଶେ ସବୁଜ ଶ୍ୟାମଳ l

ବାରିଦ ମାଳେ ଆକାଶୁ ବରଷନ୍ତି ନୀର

ସାଧବବୋହୁ ଘାସରେ ଧାଏଁ ତରଭର l

ଘୋର ବଜ୍ରପାତ ଦେଖ ପ୍ରକମ୍ପିତ ମହୀ

ବିଦ୍ୟୁଲତା ମେଘମାଳେ ଦିଏ ଝଟକାଇ l

କଳାମେଘ ଦେଖି ବନେ ନାଚଇ ମୟୁର

ପୁଚ୍ଛ ଦିଶଇ ତାହାର କେଡ଼େ ମନୋହର l

ପ୍ରାଣୀ ପାଦପେ ଜୀବନ ବରଷାର କାଳ

ଚାତକ ବନ୍ଧୁ କେବଳ ଚାତକେ ସମ୍ବଳ l

ଫରସା ହୋଇଛି ଭୂମି ପାଇ ବର୍ଷା ଜଳ

ଚଷା ଭାଇ ଫିଟାଇଛି ବିଲରେ ଲଙ୍ଗଳ l

କଦମ୍ବକୁସୁମେ ଶୋଭା ବନ ତୋଟାମାଳ

ବନେ ଗୋରୁ ଚରାବନ୍ତି ମଦନ ଗୋପାଳ l

ବର୍ଷା ଜଳେ ରଜସ୍ଥଳା ମାତା ବସୁନ୍ଧରା

ରଜ ପରଵ ଆସିଲା ବାଜିଲା ନାଗରା l

ବେଙ୍ଗ ଦେଲେ ହୁଳହୁଳି ଢାଳିଦିଅ ଇନ୍ଦ୍ର

ଛତ୍ରପ୍ରାୟ ଗୋବର୍ଦ୍ଧନ ଧରିଲେ ଗୋବିନ୍ଦ l

ବର୍ଷାକାଳ ଅଟେ ଭାଇ ଗ୍ରୀଷମର ଦାନ

ଧନ୍ୟ ସୃଷ୍ଟି କର୍ତ୍ତା ଧନ୍ୟ ୠତୁ ଆବର୍ତ୍ତନ l