ବର୍ଷା ଗୋ

ଫେରିଯାଅ ତୁମେ ଏବେ

ଝିପି ଝିପି ବରଷନା ଆଉ

ଅକୁହା ବେଦନା ମନତଳେ ଥାଉ

ତୁମେ ମନେ ପକାଅନା ଆଉ।

ତମେ କାହିଁକି ଆସିଲ

ରୁଷି ଯଦି ଯାଇ ଥିଲ ତୁମେ

ନିଦ୍ରା,ତନ୍ଦ୍ରା ହଜାଇ ମୋର

ସୁଖେ ଯଦି ରହିଥିଲ ତୁମେ।

ତୁମେ ଯାଅ ଫେରିଯାଅ 

ଅଭିମାନେ ଲୁହ ଝରାଅନା

କୋହ ମୋର ସବୁ ଲୁହ ହୋଇ ଝରୁ

ହସି ହସି ଓଠ ପିଉ ସିନା

ତୁମେ ଅଟକାଅ ନାହିଁ ଜମା।

ଯାଅ ଫେରିଯାଅ ତୁମେ

ରଂଗ ହଜିଛି ଜୀବନୁ ମୋର

ଇନ୍ଦ୍ରଧନୁର ସପ୍ତରଂଗେ

ତମେ ଆଉ ତାକୁ ରଂଗାଅନା।

ତୁମେ ଫେରିଯାଅ ଏବେ

ବୁଝାଅନା ଆଉ ମୋତେ ତୁମେ

ଚପଳା ପରି ମୋ କ୍ଷଣିକ ଜୀବନ

ଆସିଛି ଏକା ଫେରିବି ଏକା ମୁଁ

ବୁଝିସାରିଲିଣି ପରା ଏବେ

ବର୍ଷା ଗୋ ଫେରିଯାଅ ତୁମେ ।