ବର୍ଷା ..ଏକ ଋତୁର ନାମ
ବର୍ଷା ..ଏକ ଋତୁର ନାମ
ବର୍ଷା ..ଏକ ଋତୁର ନାମ
ଆଷାଢ ଆସିଛି ଶ୍ରାବଣ ଆଣିଛି,
ବିଦଗ୍ଧ ଏଇ ଯେ ବର୍ଷା I
ନଦୀ ସବୁ ଆଜି କୂଳ ଖାଇ ବହେ
ବନ୍ୟାର ତ ରହିଛି ଆଶଙ୍କା,
ତୁମ କଥା ସବୁ ବାରମ୍ବାର ଆସେ
ଜଳେ ନୀଳ ନୀଳ ଈର୍ଷା I
ଦେବଦାରୁ ଶୀର୍ଷେ ଛପିଯାଏ ସୂର୍ଯ୍ୟ
ହୃଦୟେ ଭରେ ଯେ ଦକା,
ସର୍ପ ପରି ବକ୍ର ନଦୀ ସ୍ବର୍ଣ୍ଣ ତାର,
ଅଭ୍ର ଖଣ୍ଡ ବାଲୁକା ପ୍ରାନ୍ତର I
କ୍ଷେତ ଉଜୁଡିବ ଭୀତ କୃଷକର
ଆର୍ତ୍ତନାଦ ଶୁଭେ ରହି ରହି,
ସିକ୍ତ ତାର ଶଯ୍ୟା ଏବେ ଠାଏ ଠାଏ
ଶସ୍ଯ ପରେ ରୁକ୍ଷ ବାଲୁଚର I
ବର୍ଷାର ତାଣ୍ଡବ ନୃତ୍ଯ କ୍ରମାଗତ
ପ୍ରବାହିତ ଭାବନାର ନଈ,
ନଦୀବନ୍ଧ ଉପକଣ୍ଠେ ବରଗଛ
ବିଦ୍ୟମାନ ଆଦିମ କାଳରୁ,
ପକ୍ଷୀଙ୍କ କାକଳୀ ଥିଲା ଗ୍ରାମ ଶିଶୁ I
ଓହଳରେ ଥିଲେ କ୍ରୀଡାରତ,
ବର୍ଷା ତୁମ ତାଣ୍ଡବରେ ଶ୍ରୀହୀନ ଯେ,
ସ୍ବର୍ଣ୍ଣ ଚମ୍ପା ସୁନ୍ଦର ବଗିଚା
ଅଣଚାଶ ପବନରେ ଆନ୍ଦୋଳିତ I
ସମୂଳେ ସେ ଏବେ ଉତ୍ପାଟିତ,
ବର୍ଷା ତୁମ ସ୍ପର୍ଶ ଏବେ ଅମାନିଆ,
ବୃକ୍ଷଲତା ପ୍ରତିଟି ଅଙ୍ଗରେ,
ହୃଦୟରେ ଝଡ ତାର ନଦୀ ଦେହ I
ଉତ୍ତାଳ ସେ ଢେଉ ରେ ଚଞ୍ଚଳ,
ଧରଣୀ କମ୍ପିତ ଆଜି ପୁଲକିତ I
ପ୍ରାଣବନ୍ତ ପ୍ରତିଟି ରନ୍ଧ୍ରରେ,
ଏକାକୀ କକ୍ଷରେ ବଧୂ ଭୀତତ୍ରସ୍ତ I
ଚକ୍ଷୁ ତାର ଅଶ୍ରୁରେ ସଜଳ
କଦମ୍ବବି ରୋମାଞ୍ଚିତ ଥର ଥର I
ଚମ୍ପକର ସୁନ୍ଦର ଅଙ୍ଗୁଳି,
ଚପଳ ଚପଳା ଛୁଏଁ ଧରାବକ୍ଷ,
ମେଘବକ୍ଷେ ଲୁଚେ ଅଂଶୁମାଳି I