ବୃକ୍ଷ ରୋପଣ
ବୃକ୍ଷ ରୋପଣ
ବୃକ୍ଷ ରୋପଣର ସମୟ ଆସିଛି
ହେୟ କର ନାହିଁ କେହି
ବୃକ୍ଷ ରୋପଣରେ ସବୁଜ ଶ୍ୟାମାଳେ
ହସୁ ଥିବ ଏହି ମହୀ ।
ବୃକ୍ଷକୁ ରୋପଣ କରିଲେ ମିଳିବ
ବିଶୁଦ୍ଧ ବାୟୁ ଆମକୁ
ବିଷାକ୍ତ ଅଙ୍ଗାରକାମ୍ଳ ଗ୍ୟାସ୍ ଶୋଷି
ଦେବ ସେ ଅମ୍ଳଜାନକୁ ।
ବୃକ୍ଷର ରୋପଣ ଫଳରେ ଝରିବ
ଆକାଶୁ ବରଷା ଧାରା
ସବୁଜ ଶ୍ୟାମଳେ ହସିବ ଧରଣୀ
ଜଳମଗ୍ନ ହେବ ଧରା ।
ଜଳମଗ୍ନ ହେଲେ ମରୁଡି ହଟିବ
ଲୋକେ ପାଇବେନି କଷ୍ଟ
ଜୀବଜନ୍ତୁ ସର୍ବେ ହେବେ ଆନନ୍ଦିତ
ଜୀବନ ହେବନି ନଷ୍ଟ ।
ଏଇ ବୃକ୍ଷ ଅଟେ ଆମର ତ ବନ୍ଧୁ
ଆମରି ପରାଣ ମିତ
ତାହା ଫୁଲ ,ଫଳ ତରୁର ଛାୟାରେ
କେତେ ଜୀବ ଯେ ଆଶ୍ରିତ ।
ଗଛ ଠାରୁ ବଡ ଉପକାରୀ ବନ୍ଧୁ
କଗତେ ମିଳିବ ନାହିଁ
ମଣିଷଙ୍କ ପରି ନୁହେଁ ସ୍ବାର୍ଥବାଦୀ
ସ୍ବାର୍ଥ ଥିଲେ ଥାଏ ରହି ।
ବୃକ୍ଷଟି କେବେ ଯଦି ଫୁଲ ଅବା ଫଳ
କେବେବି ସେ ଦିଏ ନାହିଁ
ଦେଖିଛକି କେବେ ତାହାର ଛାୟାରୁ
ବଞ୍ଚିତ କରିଛି ସେହି ।
ତାକୁ ହାଣି ଏଇ ମାନବ ଜାତିଟି
ବୋଲାଉଛି ଶ୍ରେଷ୍ଠ ଜୀବ
ହେଲେ ସେ ଜାଣି କି ଅଜଣା ହେଉଛି
ବୃକ୍ଷଟି ଆମ ମୂଲକ ।
ଗୋଟିଏ ସୁପୁତ୍ର ଜନ୍ମ ଦେବ ଅଟେ
ଜୀବନରେ ପୂଣ୍ୟ ତାର
ଗୋଟିଏ ବୃକ୍ଷର ରୋପଣ ଫଳରେ
ପୂଣ୍ୟ ତା ମିଳେ ଅପାର ।
ବୃକ୍ଷର ଦେବତା ସମସ୍ତେ କୁହନ୍ତି
ବୃକ୍ଷକୁ ପୂଜା କରନ୍ତି
ଏଇ ବୃକ୍ଷ ପାଇଁ ସକଳ ରିଷ୍ଟରୁ
ନିମିଷେ ରକ୍ଷା ପାଆନ୍ତି ।
ବୃକ୍ଷ ବିନା ନାହିଁ ମାନବର ଗତି
ବୃକ୍ଷ ହିଁ ଜୀବନ ଆମ
ବୃକ୍ଷଟିକୁ ରୋପି ସେବା ଯତ୍ନ କରି
କରିବା ଭକ୍ତି ପ୍ରଣାମ ।
ବୃକ୍ଷ ଆଶୀର୍ବାଦ ହସିବ ଜୀବନ
ସାର୍ଥକ ମଣିଷ ହୁଏ
ସେଥିପାଇଁ ଯୁଗ ଯୁଗ ପାଇଁ ବୃକ୍ଷ
ଦେବତାର ଆଖ୍ୟା ପାଏ ।