Library
Profile
ବଂଧୁତାର ପଥ
ବଂଧୁତାର ପଥ
ତୁମକୁ ମାଗି ନଥିଲି
ଭୂମି ତିନି ପାଦ
ଇନ୍ଦ୍ରପ୍ରସ୍ଥ ପାରିଜାତ
ତୁମ ଅବଶିଷ୍ଟ ଆୟୁଷରୁ ଅଧ କିମ୍ବା
ତୁମ ଲୋଡା ଦରବରୁ
ସୁଖ ବାର ହାତ ।।
ତୁମକୁ ମାଗି ନଥିଲି
ଗଭୀର ଭୂ-ଖଣ୍ଡର ଜଳ
ଶିପ କି ଶାମୁକାର ମୁକ୍ତା ମାଳ
ପାହାନ୍ତି ରାତିକୁ ଅବା
ତୁମ ଛାତି ଭିତରେ
କୁରୁଳି ଉଠୁଥିବା
ଦୁର୍ବଳ ମୁହୂର୍ତ୍ତ ମାନଙ୍କୁ ।।
ତୁମକୁ ମାଗି ନଥିଲି
ଦିଗ କି ଦିଗନ୍ତ
ଆଦି ଓ ଅନନ୍ତ
ସଚରାଚର ଜୀବ-ଜଗତ
ସବୁଜର କ୍ଷେତ ଅଥବା
ଗୁଣୁ ଗୁଣୁ ଶୁଭୁଥିବା
ତୁମ ବନହଂସୀ ଗୀତ ।।
ତୁମକୁ ମାଗି ନଥିଲି
ଜହ୍ନ ଆଲୁଅର ବେଳ
ଫଗୁଣର ଲୁଚକାଳି ଖେଳ
କଦମ୍ବର ମୂଳ ଅବା
ଝର୍-ଝର୍ କରୁଥିବା ଝରଣା
ଋତୁର ସମ୍ଭାର
ତୁମ ମୁକୁଳା ଅଗଣାର ତଳ ।।
ତୁମକୁ ମାଗି ନଥିଲି
ରୁଣୁ-ଝୁଣୁ ପାଉଁଜୀର ସୂର
ପାଦରେ ଅଳତାର ଧାର
ସୀମନ୍ତରେ ସିନ୍ଦୁରର ଗାର କିଂବା
କହି ନଥିଲି କେବେ ତୁମକୁ
ହେବକି' ମୋ' ତୁଠର ପଥର ।।
ତୁମକୁ ମାଗୁଛି କେବଳ
ବଢାଇ ଦୁଇ ହାତ
ଭୂମି ଠାରୁ ଭୂମା ଯାଏ ବ୍ୟାପ୍ତ
ସୁଦୃଢ ଆମ ବଂଧୁତାର ପଥ
ଆସ ! ବଢାଇଛି ହାତ !!!
*** *** ***
ଡଃ ଶିବ ପ୍ରସାଦ ତ୍ରିପାଠୀ
ସ୍ମୃତି ନିଳୟ,ଉଦୟ ନଗର
ଷ୍ଟେସନ ରୋଡ,ବଲାଙ୍ଗୀର (ଓଡିଶା)
