ବର୍ଷା : ଡାହାମିଛ ତୁମ ଋତୁରେ
ବର୍ଷା : ଡାହାମିଛ ତୁମ ଋତୁରେ
ତୁମେ ଆସ କଡ ଲେଉଟାଇ
ଥପ୍ ଥପ୍ ଆଖିର ଲୁହରେ
ମୋ' ଦେହରେ ଭିତରେ ବାହାରେ
ମାଳ ମାଳ ମେଘ ଆସ୍ତରଣର
ଡାହାମିଛ ତୁମ ଋତୁରେ ।।
ତୁମେ ଆସ ଅଲୋଡା ପଣରେ
ଚାହିଁ ବସିଥିବା ଲଂଗଳର ମୂନ
ହିଡ ଉପରେ,
କେତେ ଥୟରେ-ଲୟରେ
ଭୋକରେ- ଭୟରେ
ଫଟା କପାଳର ଆଁ ଭିତରେ ।।
କେତେଥର ପଚାରିଛି ତୁମକୁ
ତୁମ ଆସିବା ବେଳକୁ
ତୁମେ ଠକି ଥିବା ମୁହୂର୍ତ୍ତ ମାନଙ୍କୁ,
ତୁମେ କିନ୍ତୁ ନିରୁତ୍ତର ଥାଅ
ପ୍ରତିଥର ପରି ଏଥର ବି
ଦେବାରେ ମୋ' ପ୍ରଶ୍ନର ଉତ୍ତର ।
ବାଆଁରେଇ ଦିଅ ଯାହା ଖାଲି
କଥାରେ କଥାରେ
ଆଖି ମିଟିକା ମାରି
ଆକାଶର ଆଖିରେ
ଜଳ ଜଳ ଦିଶୁଥିବା
ଆଁ ଭିତରେ ଖାଁ-ଖାଁ
ମୋ ଭୂଗୋଳ ପୋଥିର ଗାଁ
ଧାରା ଶ୍ରାବଣରେ
ତୁମେ ଆସିବା ବେଳରେ
ବର୍ଷା ! ଡାହାମିଛ ତୁମ ଋତୁରେ ।।