ବଳ

#ସିଧାକଥା -୮୧

ଭାଗ୍ୟବଳେ ଜୀବ ଜନ୍ମ ପାଇଥାଏ ସୁଖ ଦୁଃଖ ସାଥେ ନେଇ,

ସମୟ ବଳରେ ମୃତ୍ୟୁ ଲଭେ ପୁଣି କିଛିଦେଇ କିଛିନେଇ |

କର୍ମବଳେ ଆମେ ମଣିଷ ମନରେ ରହିପାରୁ କିଛିଦିନ,

ଜ୍ଞାନ-ପୁଣ୍ୟବଳ ଆରଜନମକୁ ନେଇଥାଉଁ କରି ଧନ |

ମନ-ବୁଦ୍ଧି ବଳେ ସମ୍ଭବ ହୋଇବ ଯେତେ ସବୁ ଅସମ୍ଭବ,

ଧନବଳେ କିଣି ପାରିବା ଦରବ ଯିଏ ଯେତେ କହୁ ନେବ |

ଦେହର ବଳରେ ଲଢିହେବ ପୁଣି କରିହେବ ଭାରିକାମ, 

କ୍ରୋଧବଳେ ଆମେ ଡରାଇ ପାରିବା ଲୋକଟି ଥିଲେ ନରମ |

ଲୋଭବଳେ ଆମେ ପାପ ଅର୍ଜିଥାଉଁ କରିବାକୁ ଅନୁତାପ,

ମୋହବଳ ଯଦି ପ୍ରବଳ ହୋଇବ ଦୁଃଖ ଲଭିବା ନିଶ୍ଚିତ |

ମାୟାବଳେ ପ୍ରାଣୀ ନିଜ ଅଜାଣତେ ଅନ୍ଧହୋଇ ଯାଇଥାଏ,

ଈର୍ଷାବଳ ବଢେ କ୍ଷତି କରିବାକୁ ନିଜେ ଆଗ ଜଳିଯାଏ | 

ରୋଗବଳ ଯଦି ବଢି ବଢିଯାଏ ରୋଗୀହୁଏ ଅସହାୟ,

ବିଶ୍ଵାସର ବଳେ ମିଳନ୍ତି ଈଶ୍ଵର ସତ୍ୟବଳେ ହୁଏ ଜୟ |