ବିଶ୍ଵରୂପ ଦର୍ଶନ
ବିଶ୍ଵରୂପ ଦର୍ଶନ
1 min
282
ଆକାଶର ତୁମେ
ଅଟ ପରିସୀମା
ସାଗରର ତ ନୀଳିମା।
ବନାନୀର ତୁମେ
ଅଟ ସବୁଜିମା
ଧରାର ସହିବା ସୀମା।
ଚନ୍ଦ୍ରମାର ତୁମେ
ଅଟତ ଜୋଛନା
ପବନର ଶୀତଳତା।
ପାଦପର ତୁମେ
ଅଟ ପରା ଛାଇ
ଅନଳର ତ ଉଷ୍ମତା।
ତଟିନୀର ତୁମେ
ସ୍ଵଚ୍ଛ ନୀରଧାର
ତପନର ତ କିରଣ।
ଏହାହିଁ ତ ଅଟେ
ତୁମ ବିଶ୍ଵରୂପ
ତୁମ ଧରାବତରଣ।
ସ୍ଵାର୍ଥାନ୍ଧ ମଣିଷ
ନଦେଖି ସେ ରୂପ
ଧ୍ଵଂସ କରଇ କାନନ।
ପ୍ରଦୂଷିତ କରି
ପାଣି ଓ ପବନ
ସନ୍ତାପିତ କରେ ପ୍ରାଣ।
ଦିଅ ଜ୍ଞାନଚକ୍ଷୁ
ଅରଜୁନ ପରି
କରୁ ସେ ରୂପ ଦର୍ଶନ।
ଏ ସୃଷ୍ଟିର ରକ୍ଷା
ମଣିଷର ଦୀକ୍ଷା
ହେଉ ତାର ଏହି ଜ୍ଞାନ।
ନକାଟୁ କାନନ,
ପ୍ରଦୂଷିତ ଆଉ
ନକରୁ ପାଣି ପବନ।
ଏ ମଣିଷ ପାଇଁ
ଏହାହିଁ ହୋଇବ
ବିଶ୍ଵରୂପ ଦରଶନ।
**********