ବିଶ୍ବର ପ୍ରଥମ ବିବାହ

ନିଜେ ବେଦବର ନିଜ କଳେବର

ପ୍ରଜା ଉତ୍ପାଦନ ପାଇଁ ।

ଦି ଭାଗ କରିଲେ ମନୁ ଶତରୂପା

ପୁରୁଷ ନାରୀ ଏ ହୋଇ ।

ଆଦେଶିଲେ ତାଙ୍କୁ ପ୍ରଜା ସୃଷ୍ଟି କରି

ସଂସାରର ହିତ କର ।

ଦୁଇ ପୁତ୍ର ପ୍ରିୟବ୍ରତ ଓ ଉତ୍ତାନପାଦ

ହୋଇଲେ ତାଙ୍କର ।

ଆକୂତି ଦେବହୂତି ପ୍ରସୂତି ନାମେ

ତିନୋଟି କନ୍ୟା ହୋଇଲେ ।

କର୍ଦ୍ଦମ ପ୍ରଜାପତି ପୂର୍ବୁଁ ଜନମି

ତପସ୍ୟାରେ ରତ ଥିଲେ ।

ଆଦେଶ ଦେଲେ ଭଗବାନ ମନୁଙ୍କୁ

ଦେବହୂତି କନ୍ଯା ନିଅ ।

କର୍ଦ୍ଦମ ଋଷିଙ୍କ ସହିତ କନ୍ୟାର

ବିବାହ ତୁମେ କରାଅ  ।

ତେଣେ କର୍ଦ୍ଦମଙ୍କ ତପସ୍ୟାରେ

ସନ୍ତୁଷ୍ଟ ହୋଇଲେ ଭଗବାନ ।

କହିଲେ କର୍ଦ୍ଦମ ତୁମ ଉପରେ ମୁଁ

ହୋଇଅଛି ସୁପ୍ରସନ୍ନ।

ତୁମର ସୃଷ୍ଟିର ଇଚ୍ଛା ହେବ ପୂର୍ଣ୍ଣ

ବିଭା ହୁଅ ଦେବହୂତି ।

ତୁମ ପାଶେ ଆସି ମିଳିବେ କନ୍ଯା

ସହିତ ମନୁ ନରପତି ।

ମନୁ ଶତରୂପା ଦେବହୂତି କନ୍ଯା

ଘେନି କର୍ଦ୍ଦମଙ୍କ ପାଶେ।

ଦିବ୍ଯ ବିମାନରେ ପହଞ୍ଚିଲେ ଆସି

ଋଷି ଆଶ୍ରମେ ବିଶେଷେ।

ଦେବହୂତି କନ୍ୟା ସେ ମନୁ ରାଜନ

ସମର୍ପିଲେ କର୍ଦ୍ଦମଙ୍କୁ ।

କହିଲେ ବୈଦିକ ରୀତି ନୀତି ସହ

ବିବାହ କର ଏହାକୁ ।

ବିଶ୍ବର ପ୍ରଥମ ବିବାହ କର୍ଦ୍ଦମ

ଦେବହୂତିଙ୍କ ହୋଇଲା।

କପିଳ ଭଗବାନଙ୍କର ଜନମ

ଦେବହୂତି ଗର୍ଭୁଁ ହେଲା ।