ବିମାନେ ସୁନ୍ଦର ରାଧାରାଣୀ ସାଥେ

ସୋଲେ ସାଜସଜ୍ଜା ହେଉଅଛି ମଜା

  ଦୋଳେ ଝଲସୁଛି ରାଧା

ପ୍ରେମର ବନ୍ଧନ ଅଭୁଲା ସପନ

  ପ୍ରେମ ଜିତେ ସବୁ ବାଧା ll

ସେ ନନ୍ଦ କୁମର ଧନ ଗୋପୀଙ୍କର

  ଷୋଳ କଳା ପରିପୂର୍ଣ୍ଣ

ଗୋପୀ ଗୋପାଙ୍ଗନା ପ୍ରେମେ ଆନମନା

 ରାଧା ପ୍ରେମେ ଭାସେ କୃଷ୍ଣ ll

ହୁଏ ଆଲୋଚନା ରାଧାରାଣୀ ମନା

  ପାଇବାକୁ କୃଷ୍ଣ ପ୍ରେମ

ହୃଦୟ ଅଧୀର ପ୍ରତିଟି ଶ୍ୱାସର

  ଲେଖାଥାଏ କୃଷ୍ଣ ନାମ ll

ଯମୁନାର କୂଳ ମଧୁ କୁଞ୍ଜ ବନ

  ଅଭୁଲା ବସନ୍ତ କାଳ

କୃଷ୍ଣ ଚୁଡା ଫୁଲ ମାରି ଫୁଲମାଳ

 ରସେ ଝୁମନ୍ତି ଗୋପାଳ ll

ହାତେ ଫଗୁ ଧରି ପିଚିକାରି ମାରି

  ରଙ୍ଗ ଖେଳ ରାଧା ସହ

ସମୟ ହଜିଛି ଯୁଗ ବଦଳିଛି

  ଭୁଲିନୁ କୃଷ୍ଣର ମୋହ ll

ପଲ୍ଲୀର ପ୍ରକୃତି ଦୋଳ ଯାତେ ମାତି

  ଆନନ୍ଦ ବିଭୋର ମନେ

ସଜ୍ଜାଇ ବିମାନ ବସାଇ ଶ୍ରୀକୃଷ୍ଣ

  ଭ୍ରମନ୍ତି ସାରା ଭୁବନେ ll

ରଙ୍ଗ ବୋଳା ବୋଳି ହୋଇ କୋଳାକୋଳି

   ଅବିର ଲଗାଇ ଦେହେ

ଛାଡି ହିଂସା ଦ୍ୱେଷ ଭାତୃତ୍ୱେ ବିଶ୍ୱାସ

  ଦୋଳ ଯାତ ମନ ମୋହେ ll

ବିମାନେ ସୁନ୍ଦର ସେ ନନ୍ଦ କୁମର

  ଆଶିଷ ଦିଅହେ ଭରି

ଦୋଳ ପରବରେ ଗୁହାରି କରୁରେ

 ପ୍ରେମକୁ ପାଥେୟ କରି ll