ବିଲେଇ ନାନୀର ଘର ପ୍ରତିଷ୍ଠା

ବିଲେଇ ନାନୀର ଘର ପ୍ରତିଷ୍ଠା 

ଆସିଛି ବିଲୁଆ ନନା 

ପୂଜା ପାଠ ପାଇଁ ସଜବାଜ ହୁଏ 

ସଅଳ ମୂଷା ଭାଇନା ll

ପରିଶ୍ରମ କରି ଭାଇନା ଆମର 

ତୋଳିଅଛି କୋଠାଘର 

ଝଡି ବତାସକୁ ବିଲେଇ ନାନୀର 

ଆଉ କି ଅଛିରେ ଡର ll

ମନ୍ତ୍ର ପାଠ କରି ବିଲୁଆ ନନା 

ପୂଜା ବିଧି ସବୁ କଲା 

ଗଣ୍ଠିଲିରେ ବାନ୍ଧି କେତେଯେ ଦରବ 

ପାଉଣା ନେଇତା' ଗଲା ll

ବନ୍ଧୁ ବାନ୍ଧବଙ୍କୁ ଡାକିଛି ଭାଇନା 

କରିଅଛି ଭୋଜିଭାତ 

ହାତୀ, ବାଘ, ସିଂହ, ଭାଲୁ ଆସିଛନ୍ତି 

ସମସ୍ତେ ଭାଇନା ମିତ ll

ଭୋଜି ଖାଇବାକୁ ଆମ ଘରେ ଆସି 

ଭାଇନା ଯାଇଛି କହି 

ଆସ କୁନା ମୁନା ଭୋଜି ଖାଇଯିବା 

ରଖିଦିଅ ଖାତା ବହି ll

ଧାଆଁ ଧପଡ଼ରେ ବିଲେଇ ନାନୀ 

ଯାଇଛି ହାଲିଆ ହୋଇ 

ଝରକା ଖୋଲି ପଲଙ୍କ ଉପରେ 

ନିଦରେ ଯାଇଛି ଶୋଇ ll

ଭୋଜି ସରିଲା ସବୁ ସରିଲା 

ଗୃହ ପ୍ରବେଶର ବିଧି 

ମୂଷା ଭାଇନାର ଦେହ ଭଲନାହିଁ 

ଖାଉଛି ସେ ଅଉଷଧି ll