ବିଜୟିନୀ

ରୋମାଣ୍ଟିକ କବି ମାୟାଧର ମାନସିଂହ

କାହାର ହୃଦୟରକ୍ତ ଅଳକ୍ତକ କରି

ଚରଣ ରଞ୍ଜିଛି ସଖି ? ବାନ୍ଧିଛି କବରୀ

କା'ର ଦୀର୍ଘ ମନୋରଥେ ? ଗର୍ବିତ ଝଙ୍କାରେ

କା'ର ଚିର ପରାଜୟ,କଙ୍କଣ ପ୍ରଚାରେ

ନିଖିଳ ଜଗତ ଭରି ? ଉରଜ ବନ୍ଧୁର

କାହାରେ ଅବଜ୍ଞା କରି ଚିର ଉର୍ଦ୍ଧ୍ବ-ଚୂଳ

ଅନୁପମ-ଅହଙ୍କାରେ ? କର୍ଣ୍ଣ-ପୁଷ୍ପ ଦ୍ବୟ

କନକ ଜ୍ବଳନେ ଘୋଷେ ମଙ୍ଗଳ ବିଜୟ

କେଉଁ ଧୃଷ୍ଟ ଆସ୍ପର୍ଦ୍ଧାର ? ମଞ୍ଜୁଳ କବରୀ

କେଉଁ ଜୟ ଘୋଷଣାରେ ଦେଇଅଛ ଭରି

ଚମ୍ପକ ମଞ୍ଜରୀ ମାଳେ ? ଅୟୀ ବିଜୟିନୀ

କିଏ ସେ ନିରୀହ ଶତ୍ରୁ ?- ମୁହିଁ ? ଏ କିଙ୍କିଣୀ

ମୋହରି ବିଜୟେ ବାଜେ ? ତେବେ ପରାଜୟ

କରିନେଲି, ତୋ' ଗୌରବ ହେଉ ବିଶ୍ଵମୟ ।

ସମାପ୍ତ