ବିଜ୍ଞାନ ଦେଇଛି କେତେ ଯେ ଖୁସି

ଲାଗଇ ଛୋଟିଆ ବିଶାଳ ପୃଥିବୀ

କେବଳ ବିଜ୍ଞାନ ଅବଦାନରେ

ତାହାକୁ ଭେଟୁଛୁ ପ୍ରତିଟି ମୁହୂର୍ତ୍ତ

ସକଳେ ନିଜର ଚଲାପଥରେ ।

ନିତ୍ୟ ବ୍ୟବହାର୍ଯ୍ୟ ଯେତେ ସାମଗ୍ରୀଠୁ

ବାସଗୃହ ସହ ଖାଦ୍ୟ, ପୋଷାକ

କେଉଁଥିରେ ନାହିଁ ବିଜ୍ଞାନର ଛାପ

କହି କି ପାରିବେ କେହି ଭୂଲୋକ ?

ଛାପାଖାନା ପାଇଁ ତାଳପତ୍ର ପୋଥି

ଦେଖିପାରେ ନାହିଁ ଏବର ପିଲା

କମ୍ପ୍ୟୁଟର ଦ୍ବାରା ଜାତକ ଗଣନା

ବ୍ଲଡ଼ ଗ୍ରୁପ ଦେଖି ବିବାହ ହେଲା ।

ପାଣିରେ ବୁଡ଼ିଲେ ଆକାଶେ ଉଡ଼ିଲେ

ରାନ୍ଧୁଣିଆ, ପରଷୁଣୀ ରୋବଟ

ନିଜ ଘରେ ବସି ଅଫିସ୍ କାମଟି

ଯୋଗାଯୋଗ ରଖି ଇଣ୍ଟରନେଟ ।

ପାଠପଢ଼ାଠାରୁ ନଥିପତ୍ର କାର୍ଯ୍ୟ

ସବୁ ହେଉଅଛି ଏହା ମାଧ୍ୟମେ

ଟଙ୍କା ଜମାଠାରୁ ଉଠାଣ ପର୍ଯ୍ୟନ୍ତ

କିଣାବିକାରେ ବି ଲାଗେ କରମେ ।

ଦେଶବିଦେଶର ଖବର ପହଞ୍ଚେ

ସବୁରି ପାଖରେ ଆସି ତତ୍କାଳ

ମୁହଁ ଦେଖାଦେଖି କଥା କୁହାକୁହି

ମାଧ୍ୟମ ବନିଛି ଭିଡ଼ିଓ କଲ ।

ଅଜଣା ଅଛପା ନାହିଁ ବି କାହାକୁ

ବିଜ୍ଞାନ ଦେଇଛି କେତେ ଯେ ଖୁସି

ସୁଖରେ ସଭିଏଁ ବାନ୍ଧିବାକୁ ବସା

ସବୁରି ମଥାକୁ ଦିଏ ଆଉଁସି ।।