ବିଦ୍ୟାର୍ଥୀ

ବିଦ୍ୟା ଆହରଣେ ସ୍ଥାନ-କାଳ-ପାତ୍ର

ଭେଦରୁ ଉର୍ଦ୍ଧ୍ବକୁ ଉଠି,

ନୀତି-ଅନୀତିର ବିଭେଦକୁ ବୁଝି

ଅଗ୍ରସର ସୁବିଦ୍ୟାର୍ଥୀ ।

ଅନଳ, ଅନୀଳ, ଉଦକ, ଯେପରି

ସ୍ବଧର୍ମ ଛାଡ଼ନ୍ତି ନାହିଁ ,

ଅସଲ ବିଦ୍ୟାର୍ଥୀ ଜ୍ଞାନ ଅନ୍ଵେଷଣେ

ଆଜୀବନ ଥାଏ ରହି।

ଅଧ୍ୟବସାୟରେ ପର ଉପକାର ,

ମିତବ୍ୟୟିତାକୁ ଗୁନ୍ଥି ,

ଦେଶ ମାତୃତ୍ୱର ଋଣ ସୁଝିବାରେ

ଜୀବନକୁ କରେ ବ୍ରତୀ।

ସଦଜ୍ଞାନ, ସତ୍ ଚରିତ୍ର,ଶୃଙ୍ଖଳା

ଆଦର୍ଶବାଦକୁ ନେଇ,

ସାର୍ଥକ କରିବା ମଣିଷ ଜନମ

ସଚ୍ଚା ବିଦ୍ୟାର୍ଥୀଟେ ହୋଇ।