🥦🌹 *ବିଦ୍ୟା*🌹🥦 🥦🌹🙏🌹

ବିଦ୍ୟା ବିନା ନାହିଁ ମଣିଷର ଗତି

   ବିଦ୍ୟା ଅଟେ ମହାଧନ 

ମନ ଧ୍ୟାନ ଦେଇ ଉଚିତ୍ ମାର୍ଗରେ

    ବିଦ୍ୟା କର ଉପାର୍ଜନ ।

ଯେଉଁ ସମୟରେ ବିଦ୍ୟା ଆବଶ୍ୟକ 

    ସେହି ସମୟରେ କର 

ଅବହେଳା କେବେ କରନାହିଁ ତାକୁ

   ସିଏ ସମ୍ମାନ ଭଣ୍ଡାର ।

ବିଦ୍ୟା ତ ଅଟଇ ବିଭିନ୍ନ ପ୍ରକାର 

    ଯାହା ମନ ଯାହା ଧରେ

ସେହି ଅନୁସାରେ ନିଜକୁ ସେ ଗଢେ

    ବିଦ୍ୟା ଅଧ୍ୟୟନ କରେ ।

କିଏ ଯୁଦ୍ଧବିଦ୍ୟା ଶିକ୍ଷା କରି ନିଜ

       ମାତୃଭୂମି ରକ୍ଷା କରେ

କିଏ ଚାଷ ବିଦ୍ୟା ଆହରଣ କରି

     ଆହାର ଦିଏ ମୁଖରେ ।

କିଏ ନୃତ୍ୟ କିଏ ସଙ୍ଗୀତ ବିଦ୍ୟାକୁ

     ଭଲ ଭାବେ ଶିକ୍ଷା କରେ

ଦେଶ ବିଦେଶରେ ବଢେ ତାର ଖ୍ୟାତି 

   ବିଦ୍ୟାର ପରଶ ଧାରେ ।

ବିଦ୍ୟାଟି ଅଟଇ ମହା ଶକ୍ତିଶାଳୀ 

    ଜିତାଏ ସେ ସବୁ ସ୍ଥାନେ 

ଜ୍ଞାନର ଭଣ୍ଡାର ସିଏ ହେଇଥାଏ

    ପଣ୍ଡିତ ବୋଲାନ୍ତି ଜନେ ।

ରାଜନୀତି ବିଦ୍ୟା ପାଇଁ ଏ ଜଗତ

    ଶାସନ ଚାଲିଛି ଆଜି

କୂଟ ଚକ୍ରାନ୍ତର କୁହୁକ ବିଦ୍ୟାରେ

    କେବେ ଯାଏ ସିଏ ହଜି ।

ବିଦ୍ୟା ଯେଉଁଠାରେ ଆହରଣ ହୁଏ

    ବିଦ୍ୟାଳୟ କୁହାଯାଏ

ଗୁରୁକୁଳାଶ୍ରମେ କିଏ ପଢୁଥାଏ 

    ତପୋବନଭୂମି କିଏ  ?

ବିଦ୍ୟା ଦାନ ଯିଏ ଦେଉଣ ଥାଆନ୍ତି 

    ବିଦ୍ୟାଦାତା କୁହାଯାଏ 

ବିଦ୍ୟା ଶିକ୍ଷା ଦେବାପାଇଁ ସ୍ଥାନ କାଳ

    ସମୟ ନା ଲୋଡା ଯାଏ ।

ଗୌତମ ବୁଦ୍ଧ ଯେ ବୋଧିଦ୍ରୁମ ତଳେ

    ବିଦ୍ୟା ସିଦ୍ଧି ପ୍ରାପ୍ତ ହେଲେ

ବିଦ୍ୟା ଶିକ୍ଷାପାଇଁ ଗ୍ରହରାଜ ଶନି

    ମର୍ତ୍ତ୍ୟ ଆଗମନ କଲେ ।

ରାବଣଠୁ ରାମ ରାଜନୀତି ବିଦ୍ୟା 

    ଶିକ୍ଷାଲାଭ କରିଥିଲେ

ଯୁଦ୍ଧର କ୍ଷେତ୍ରରେ ମରଣ ସ୍ଥାନରେ 

    ପ୍ରଦାନ ଲଙ୍କେଶ କଲେ ।

କୂଟନୀତି ବିଦ୍ୟା ପଶାଖେଳ ବେଳେ

     ଶକୁନି ପ୍ରୟୋଗ କଲେ

ମନ୍ଦ ବୁଦ୍ଧି ବିଦ୍ୟା ଦେଇ ଦୁର୍ଯ୍ୟୋଧନେ

    ବଂଶ ବୁଡାଇଣ ଦେଲେ ।

ଯୁଦ୍ଧ ବିଦ୍ୟା ଶିକ୍ଷା କରିବାର ଇଚ୍ଛା 

    ଏକଲବ୍ୟ ରଖିଥିଲେ

ଅଗନା ଅଗନି ବନସ୍ତରେ ରହି

     ଯୁଦ୍ଧବିଦ୍ୟା ସେ ଶିଖିଲେ ।

କେଉଁ ବିଦ୍ୟା ଘର ପରିବାର ଭାଙ୍ଗି 

    ଲହୁ ଲୁହାଣ କରଇ 

କେଉଁ ବିଦ୍ୟା ପରିବାର ଯୋଡିଦେଇ

   ସୁଖ ଶାନ୍ତି ଭରି ଦେଇ ।

ବିଦ୍ୟାର ଦୁଇଟି ରୂପ ରହିଥାଏ

    ଭଲ ମନ୍ଦ ଦୁଇ ପକ୍ଷ

ଗୋଟିଏ ଦୁର୍ନାମ ଗୋଟିଏ ସୁନାମ

    ହୁଏ କିଏ ସାହାପକ୍ଷ ।

ଗୁଣି ଗାରେଡିର ତନ୍ତ୍ର ମନ୍ତ୍ର ବିଦ୍ୟା 

    ଜୀବନକୁ ଜାଳି ଦିଏ

ଝଡା ଫୁଙ୍କା ବିଦ୍ୟା ମୁଖେ ହସ ଦିଏ

    ଜୀବନ ବଞ୍ଚାଏ ସିଏ ।

ନିଜ ବିଦ୍ୟା ବୁଦ୍ଧି ଖଟାଇ ମାନବ

    ଉଚିତ୍ ମାର୍ଗରେ ଯାଏ

ଯଶ ଖ୍ୟାତି ସମ୍ମାନର ଅଧିକାରୀ 

   ହେଇ ପୂଜା ପାଉଥାଏ ।

ଜ୍ଞାନର ଆଲୋକ ହେଇଥାଏ ସିଏ

    ପଥ ଦେଖାଇଣ ଦିଏ

ଅଜ୍ଞାନ ତିମିର ବିନାଶ କରି ସେ

    ମୁକ୍ତି ପଥକୁ ଦେଖାଏ ।

ବିଦ୍ୟା ବିନା ନାହଁ କାହାର ଯେ ଗତି

    ବିଦ୍ୟା ଅଟେ ମହାଧନ

ଏଇ ବିଦ୍ୟା ପାଇଁ ଗୁରୁ ଶିଷ୍ୟଙ୍କର

    ସମ୍ପର୍କ ସତ୍ୟ ଅଭିନ୍ନ ।

ବିଦ୍ୟା ପାଇଁ ଆଜି ଏଇତ ଦୁନିଆ 

    ହେଉଛି ପରିଚାଳିତ 

ଏଇ ବିଦ୍ୟା ଯୋଗୁଁ ମୁର୍ଖ କାଳିଦାସ 

     ହେଲେ ପଣ୍ଡିତେ ବିଖ୍ୟାତ ।

ଗୁରୁ ବିନା ବିଦ୍ୟା ସିଦ୍ଧି ହୁଏନାହିଁ 

    ଗୁରୁ ଚିର ପୂଜ୍ୟ ଆମ

ତାଙ୍କ ଆଶୀର୍ବାଦେ ପୂର୍ଣ୍ଣ ହୁଏ ସବୁ

   ଜୀବନର ମନସ୍କାମ ।

ସତ୍ ମାର୍ଗେ ବିଦ୍ୟା ଉପାର୍ଜନ କର

   ସିଏ ସାହାପକ୍ଷ ହେବ

କର୍ଣ୍ଣ ପରି ବିଦ୍ୟା ଆହରଣ କଲେ

    ମୃତ୍ୟୁକୁ ଡାକି ଆଣିବ ।

ଗୁରୁ ବିନା ବିଦ୍ୟା ସମ୍ଭବ ନୁହଁଇ 

    ଜୀବନ ବର୍ବାଦ ହୁଏ

ଏଇ ବିଦ୍ୟା ଉପଯୋଗ କରି ସିଏ

    ନିଜ ପେଟ ପୋଷିଥାଏ । 

ଶ୍ରଦ୍ଧା ଭକ୍ତି ଭାବେ ଗୁରୁଙ୍କ ଚରଣେ

   ସର୍ବଦା ପ୍ରଣାମ କର

ଗୁରୁ ଆଶୀର୍ବାଦେ ଡେଇଁ ଯିବ ତୁମେ

   ସପ୍ତସିନ୍ଧୁ ପାରାବାର ।