ଭୁଲ୍ ବୁଝିବାନି ସାଥୀକୁ କେବେ

ଏକାନ୍ତ ଜୀବନ ନିସଙ୍ଗ ସମାନ

ମିଳେ କି ଜୀବନ ସୁଆଦ 

ଥିଲେ ସାଥୀ ପାଖେ ସୁଖେ ଅବା ଦୁଃଖେ

ଭରିଦେବ ସିନା ଆନନ୍ଦ 

ଦୁଃଖ, ବିଷାଦ

ନଥିବ କାହାର ମନରେ

ପ୍ରୀତି ବୋଳାବୋଳି ସମ୍ପର୍କକୁ ଚାଳି

ଚଳୁଥିବା ନିତି ସୁଖରେ ।

ଭଲ ସାଥିଟିଏ ମନ ବୁଝିଥାଏ

ବିପଦେ ସଖା ସମ ରହି

ଆଶ୍ବାସନା ବାଣୀ ହୃଦ-କ୍ଷେତେ ବୁଣି

ବିଶ୍ବାସ ଭରସାର ମଇ

ଦେଇ ଚାଲଇ

ସମାନ ନହେଲା ପର୍ଯ୍ୟନ୍ତ

ମୁଖାମୃତ ଝର ଆହା କି ମଧୁର 

ଶୁଷ୍କ ମନ ଶାନ୍ତ ତୃପତ ।

ସମୟ ଚକରେ ଖିଆଲି ମନରେ 

କଷ୍ଟ ଦିଏ କିଏ ଆନରେ

ତାହାକୁ ନଧରି କ୍ଷମାକୁ ଆଚରି

ସହିଯିବା ବଡ଼ପଣରେ

ତେବେ ସମ୍ପର୍କେ

ନ ହୋଇବ କେବେ ବି ଫାଟ

ବାନ୍ଧି ପାରି ହିଆ ଦୃଢେ ହୋଇ ଠିଆ

ରଖି ପାରିବା ମନ ତୁଷ୍ଟ ।

ଆପଣାର ଯିଏ ତ୍ରୁଟି ଦେଖି ସିଏ

କହଇ ପଦିଏ ଚେତାଇ

ସେକଥାକୁ ଯେବେ ମନ ଭୁଲ୍ ଭାବେ

ସତଠାରୁ ଯିବା ଦୂରେଇ

ସେଥିପାଇଁ କି

ଭୁଲ ବୁଝିବାନି ସାଥୀକୁ 

ଗୁରୁ ବାକ୍ୟ ମାନି ହେବା ମନେ ଧନୀ

ସୁଧାରିଲେ ସିନା ନିଜକୁ ।