ଭରସା

ଚତୁର୍ଦିଗ ବ୍ୟସ୍ତତାରେ ପୁଣି

ଭସା ଭସା ମେଘ ସନ୍ଧିରେ ବରଷା ।

ଦୁନିଆଁ ଚେଇଲାଣି ବୋଧେ,

ମନରେ ଭର୍ତ୍ତି ଅହେତୁକ ଆଶା ।।୧।।

ତୋ ପାଇଁ ବଦଳେ ପ୍ରକୃତି,

ପୃଥିବୀର ଚେହେରା ପୁଣି ନକ୍ସା ।

ପେଟକୁ ଦାନା ସଞ୍ଚିବାକୁ

ସଜ ବାଜ ହେଲାଣି ପୁଅ ଚଷା ।।୨।।

ଅପସରିଗଲାଣି ଧରାରୁ ଗରମ

ପାଖେଇ ଗଲାଣି ପଖାଳ କଂସା ।

ଧରଣୀ ରାଣୀ ଏଠି ସବୁଜ ଶାଢୀରେ

ରଜବତୀ ପରେ,  ସେ ଦିଶେ ସରସା ।।୩।।

ଋତୁ ଗଲେ ଋତୁ ଆସେ ଧାଇଁ

ମୟୂରୀ ପୁଚ୍ଛ ମେଲି ନାଚେ ସହସା ।

ମାଟି ବାସେ ମହମହ-ଟିପିଟିପି ବର୍ଷାରେ,

ପଶୁପକ୍ଷୀ ଖେଳନ୍ତି ଆନନ୍ଦେ,ସଜାଡ଼ିବାକୁ ବସା ।।୪।।

କ୍ଷେତ ବିଲ ନାଳ ପୁଣି ପୋଖରୀ ନଈ

କୁଳ ଖାଇଯାଏ। ଆସି ବରଷା ।

ସଜାଡି ହଳ ନଙ୍ଗଳ ବାଡ଼ି,

ଚାଷୀ ବାହାରିଯାଏ ବର୍ଷାକୁ କରି ଭରସା ।।୫।।