ଭରଚୁଆଲ ବିବାହ

କନ୍ୟା ପିତାଙ୍କର ଭାଳେଣି ପଡିଲା

 ବିବାହ ହେବ କେମିତି

କରୋନା ପାଇଁ ତ ଲାଗେ କଟକଣା

 ପୁରୋହିତ ପାଇଁ ରାତି।

ମୁଣ୍ଡେ ହାତ ଦେଇ ବସି କନ୍ୟାପିତା

 ଭାବୁଥାନ୍ତି ଦୁର୍ଦ୍ଦିନକୁ

କେହି ଜଣେ ଆସି କହିଲା ତ ହସି

 ଭରଚୁଆଲ ବିବାହକୁ ।

ଅନଲାଇନରେ ଲିଙ୍କ ପଠାଇଣ

 ତାରିଖ ହୋଇଲା ସ୍ଥିର

ବରବେଶ ହୋଇ ବସିଥିଲେ ପାତ୍ର

 ଖୋଲିଦେଲେ ମୋବାଇଲ।

ବ୍ରାହ୍ମଣ କରିଲେ ମନ୍ତ୍ର ଉଚ୍ଚାରଣ

 ନିଜ ଘର ଅଗଣାରେ

କନ୍ୟା ସଜ ହୋଇ ଗହଣା ତ ପିନ୍ଧି

 ଅଳସ ଛାଡେ ଖୁସିରେ।

ବର ମନ ଖୁସି ବାଜୁ ନାହିଁ ଅଗ୍ନି

 ବସିବାକୁ ପଡୁ ନାହିଁ

ଗୋଡକୁ ଲମ୍ବାଇ ନାଲି ପାଣି ପିଇ

  ହାତଗଣ୍ଠି ପଡୁଥାଇ ।

ବନ୍ଧୁ ବାନ୍ଧବ ତ ହୁଳହୁଳି ଦେଲେ

 ଅନଲାଇନ ଯୋଗ ଦେଇ

ଘର ପିନ୍ଧା କସ୍ତା ମୁଣ୍ଡ ତ ନୁଖୁରା

 ଖୁସିବାସ ମନେ ନାହିଁ।

କନ୍ୟା ମାତା ଦୁଃଖେ କହଇ ଶୁଣୁଛ

 କିଛି ତ ପାଇଲି ନାହିଁ

ସାହି ପଡିଶାଙ୍କ ବାହାଘର ବେଳେ

 ଦେଉଥିଲି ସୁନା ମୁହିଁ।

ଫସର ଫାଟିଲା ପାଣିରେ ପଡିଲା

 ଦେଇଥିଲି ଯାହା ସବୁ

ଭରଚୁଆଲ ବିବାହ ପାଇଁକି

 ଖସିଗଲେ ପରା ସବୁ ।

ବର କାନ୍ଦୁଅଛି ପାଇଲିନି କିଛି

 ଆଙ୍ଗୁଠି ମୋ ଖାଲି ପରା

ଶାଶୁଙ୍କର ଚେନ ବନ୍ଦାଣ ଥାଳିଟା

 ସବୁ କିଛି ଫାଙ୍କା ପରା ।

ବ୍ରାହ୍ମଣଟା ଖୁସି ଗୁନ୍ଦୁରାଇ ଦେଲେ

 କେହି କେବେ ଜାଣିବେନି

ଦଶଟା ମନ୍ତ୍ରରେ ପାଞ୍ଚଟା ପଢିଲେ

 ଟଙ୍କାତକ ନେବି ଛାଣି ।

କନ୍ୟାପିତା ଖୁସି ଖରଚ ହେଲାନି

 ରହିଲା ଟଙ୍କା ବ୍ୟାଙ୍କରେ

ବରପିତା ଖୁସି ରିସେପସନରୁ

 ତ୍ରାହି ମିଳିଲା ସତରେ ।

ସଭିଏଁ ଖୁସିରେ ମଜ୍ଜୁଥିଲା ବେଳେ

 ଭୋଜି ଖାଇବାକୁ ମସ୍ତ

ଆଉଟୁ ପାଉଟୁ ଦୁଃଖର କୋହରେ

 ପେଟେ ମାରୁଥାଏ ହାତ।

ଭରଚୁଆଲର ଜମାନା ଏହିରେ

 ଘରେଘରେ ସବୁ କାମ

କଥାରେ କଥାରେ ଘଟିଯାଏ ପରା

 କରୋନାର କୀର୍ତ୍ତିମାନ।