କାଲି ପରି ଲାଗେ

ବଦଳିଛି ରାସ୍ତା ହଜିଛି ମହକ

ଖୋଜିଲେ ବି ମିଳିବନି

ସେହି ମାଟି ରାସ୍ତା କାଦୁଅ ହେଲେବି

ମନରୁ ତ ଲିଭିବନି।

ଧେନୁପଲ ଯେବେ ହମ୍ବା ରଡ଼ି କରି

ଫେରୁଥିଲେ ସେହି ବାଟେ

ଗୋଧୂଳି ଲଗନେ ନାଲି ମୂରୁଜ ତ

ବିଞ୍ଚି ହୁଏ କେତେ ଥାଟେ।

ଶଗଡ଼ ଗାଡ଼ିର ଘର୍ ଘର୍ ଶବ୍ଦ

ଶୁଭିବନି ଆଉ କେବେ

ଗୋବର ରୋଗର ଶଗଡ଼ ଗାଡ଼ିରେ 

ବିଲକୁ ଯିବନି ଏବେ।

ନାଲି ମଖମଲି ଲୁଗା ପିନ୍ଧି ଆଉ

ଚାଲୁନି ସାଧବ ବୋହୂ 

ସପନ ହେଲାଣି ଦେଖିବାକୁ ତାକୁ

ଇତିହାସ ହେଲା ସେହୁ।

ତିନି ଚକିଆ ତ ରିକିସା ଲୁଚିଲା

ସମୟର ଚକତଳେ

ଶୂନଗାଡି ସିନା ଚାଲୁଛି କେବଳ

ତାର ବେଳ କେତେବେଳେ।

ପିଚୁ ରାସ୍ତା ଅବା ପକ୍କା ରାସ୍ତା ଏବେ

ସବୁଠି ତ ଦୃଶ୍ୟମାନ 

ନାହିଁ ତ ଜୀବନ ରାସ୍ତାଗୁଡିକରେ

ଚାଲୁଅଛି ଖାଲି ଯାନ।

ମନ ତ ବୁଝୁନି ଖୋଜେ ସେହି ଗାଆଁ 

ଛାଡ଼ି ଯାଇଥିଲି ଯା'କୁ 

କାଲି ପରି ଲାଗେ ମୋ ଗାଆଁ ମାଟିରେ 

ବିତେଇଛି ଅତୀତକୁ।