ଭରଚୁଆଲ ବିବାହ

କି ଥିଲା ଭାରତ କି ହୋଇଛି ଆଜି

  ଭାବିଲେ ଘୂରଇ ମଥା

ବୈଦିକ ରୀତିର ବିଭାଘର ଛାଡ଼ି

    ଭରଚୁଆଲ ବିଭା ପ୍ରଥା |

ବିବାହ ପବିତ୍ର ପୁଣ୍ୟ ପରମ୍ପରା

   ଦେବପୀଠେ ସମାହିତ

ସ୍ୱର୍ଗରେ ଦମ୍ପତି ସଂଯୋଗୀକରଣ

   ଶାସ୍ତ୍ରମତ ଅଭିହିତ |

ଭୁଲି ପରମ୍ପରା ନଷ୍ଟ ନାରୀନରା 

   ସ୍ମାର୍ଟ ଫୋନ ଧରି

ମେସେଜ ଚାଟିଂ ବାର୍ତ୍ତାଳାପ କରି

  ପ୍ରେମ ପଥ ଅନୁସରି |

ନାହିଁ ଅନୁଧ୍ୟାନ ଶରୀର ଦର୍ଶନ

   କୁଳ ଗୋତ୍ର ନିରୂପଣ

ପିତା ମାତା ଅବା ବାନ୍ଧବ ସ୍ୱଜନ

   କାହାରି ଅନୁମୋଦନ |

ନାହିଁ ଲୋଡ଼ା ଶୁଭ ବିବାହ ବେଦିର

   ବ୍ରାହ୍ମଣ ମନ୍ତ୍ର ପଠନ

ଲୋଡ଼ାନାହିଁ ଗାଡ଼ି ଘୋଡ଼ା ସାଜସଜ୍ଜା

   ଭୋଜି ଭାତ ଆୟୋଜନ |

ପବନରେ ବାହାଘର ଦର୍ପଣରେ

   ପ୍ରତିବିମ୍ବ ଦରଶନ

ଏପରି ସମ୍ପର୍କ କେତେ ଦୃଢ଼ୀଭୂତ

  ବିଚାର କରନ୍ତୁ ମନ |

ନାହିଁ ସାମାଜିକ ନ୍ୟାୟିକ ସ୍ୱୀକୃତି

   ନାହିଁ କେହି ଗ୍ୟାରେଣ୍ଟର

ଦାମ୍ପତ୍ୟ ଜୀବନ ନୁହଁଇ ଶୋଭନ

  ଯୌନଭୋଗ ପ୍ରଧାନ୍ୟର |

ଏ ପଶୁ ପ୍ରବୃତ୍ତି ନାରକୀୟ ଗତି

   ପ୍ରେମ ସଜ୍ଞା ପ୍ରତିହତ 

ପାଶ୍ଚାତ୍ୟ ବେଭାର ହୃଦୁ ପରିହର

    ସ୍ୱଧର୍ମେ ହୁଅ ଆସକ୍ତ |