ଭୋକ

ହାଡର ହିଡରେ ସପନ ବୁଣୁଛି

             ଦୁଃଖର ଦୋଳିରେ ବସି

ମଲାନଈ କୂଳେ ମଶାଣୀ ଡାକୁଛି

             ପାଉଁଶ ମୁଠାଏ ଲେସି ।

ମାଟିର ଦେହରୁ ଝରଇ ରକତ

              ଆକାଶକୁ ଚାହିଁ ଚାହିଁ

କେଉଁ ଦୂରଦେଶେ ବନ୍ଧା ପଡ଼ିଅଛି

              ବରଷାର ଦେଖା ନାହିଁ ।

ଛାତିର ଛାଇରେ ସାହୁକାର ଆଖି

              ପିଠିରେ ବୟସ ଭାର

ଆଖିରେ ନାଚଇ ଦଶ ପ୍ରାଣୀଙ୍କର

              ଦାନା ପାଇଁ ହାହାକାର ।

ପାଞ୍ଚ ଦିନ ତଳେ ବାବୁର ଦୟାରେ

               ଜଳିଥିଲା ଯେଉଁ ଚୁଲି

ସେଇ ଦିନ ମୋର ରୋଗୀଣା ମାଆ'ଟା

               ସଞ୍ଜବେଳେ ଗଲା ଚାଲି ।

ମୁଠାଏ ପଖାଳ, ତେନ୍ତୁଳିର ଝୋଳ

               ମିଳୁନି ଯାହାକୁ ଆଜି

ସିଏ କି ଖୋଜିବ ଖିରୀ ଓ ପଲାଉ

               ବଡ ବଡ଼ିଆଙ୍କ ଭୋଜି ।

ଭୋକର ଭୂଗୋଳ ଦୁଆରେ ଖୋଜୁଛି

               ଗଜା ବିହନର ଲୁହ

ଗରିବର ଦୁଃଖ କେତେଦିନେ ଆଉ

                ତୁମକୁ ଶୁଭିବ କୁହ ???