ଭକ୍ତିର କାଗଜ ଡଙ୍ଗା
ଭକ୍ତିର କାଗଜ ଡଙ୍ଗା
ବିଚ୍ଛନ୍ନାଚଳରେ ଘରଟି ମୋହର
ଜଗନ୍ନାଥ ପଦେ ଧ୍ୟାନ,
ଚରଣ ସେବାରେ ରହି ଅଛି ମନ
କିନ୍ତୁ କପଳଟି ହୀନ ।
ଯାଇ ପାରୁ ନାହିଁ ବଡ଼ଦେଉଳକୁ
ଅର୍ଥ ଶୂନ୍ୟ ପ୍ରଭୁ ମୁହିଁ
ମୋହରେ ନ ପଡେ ଜଗନ୍ନାଥ ଡୋର
ହୀନ କପାଳିୟା ମୁହିଁ ।
କାଗଜ ଡଙ୍ଗା ଟି ନିର୍ମାଣ କରିଛି
ଅତି ଯତ୍ନ କରି ମୁହିଁ,
ଜଗନ୍ନାଥ ମୂର୍ତ୍ତି କାଗଜେ ଅଙ୍କିତ
ପ୍ରେମ ଭକ୍ତି ଶ୍ରଦ୍ଧା ତହିଁ ।
ଧୁପ ଦୀପ ପୁଷ୍ପ ନୈବେଦ୍ୟ ତହିଁରେ
ଅତି ଯତ୍ନେ ରଖି ଅଛି,
ଭକ୍ତିର ସନ୍ଦେଶ ଚିଠିରେ ଲେଖିଛି
ଆଦରେ ପଢିବୁ ବାଛି ।
ବାଲ୍ୟକାଳ ଖେଳ କାଗଜ ଡଙ୍ଗାର
ମନେ ପଡ଼ି ଗଲା ସେହୁ
ସେହୁ ଖେଳ ଡଙ୍ଗା ନିର୍ମାଣ ଭକ୍ତିରେ
ଚରଣ ସେବିବ ସେହୁ ।
ଖଡ଼ଖାଇ ନଦୀ ପାଶରେ ଗାଆଁ ଟି
ଘର ରହି ଅଛି ମୋର
ତହରି ଭକ୍ତିରେ ଡଙ୍ଗା ଛାଡୁ ଅଛି
କୁଳେ ପହଞ୍ଚିବ ତୋର ।
କରିବୁ ସୁଦୟା ପ୍ରଭୁ ଜଗନ୍ନାଥ
ଶୁଣିବୁଟି ମୋର ଭକ୍ତି,
ଭକ୍ତି ମନେ ମୁହିଁ ନୈବେଦ୍ୟ ରଖିଛି
ଆଦର କରିବୁ ଭକ୍ତି ।
ଡଙ୍ଗା ନୂହେ ଏହୁ ଭକ୍ତିର ସନ୍ଦେଶ
ଭକ୍ତିରେ ମୁଁ ଛାଡୁ ଅଛି,
ବାଲ୍ୟ କାଳକଥା ମନରେ ରଖିଣ
କାଗଜ ଡଙ୍ଗା କରିଛି ।
ଭକ୍ତି ମୋର ପ୍ରଭୁ ଗ୍ରହଣ କରିବୁ
ତୋର କୁଳେ ଲାଗୁ ଡଙ୍ଗା
କରିବୁ ଗ୍ରହଣ ପୂଜାର ନୈବେଦ୍ୟ
ପବିତ୍ର କରିବୁ ଡଙ୍କା ।
ବିଚ୍ଛନ୍ନାଚଳରେ ଘରଟି ମୋହର
ଜଗନ୍ନାଥ ପଦେ ଧ୍ୟାନ,
ଚରଣ ସେବାରେ ରହି ଅଛି ମନ
କିନ୍ତୁ କପଳଟି ହୀନ ।