ଭଗ୍ନ କୋଣାର୍କର ନଟି

ଭଗ୍ନ କୋଣାର୍କର ଭଗ୍ନ ଶିଳlପରେ

     ଖୋଦିତ ଯେ ଯେଉଁ ନଟୀ,

ଆଜିବି ସେମିତି ଆବେଗିକ ଭାବେ

     ବାଢିଦିଏ ପ୍ରେମଭେଟି |

କେଉଁ ଶିଳ୍ପୀର ଯେ ହୃଦୟ ବେଦନା

     ବିରହୀତ ପ୍ରୀତିଭାଷା,

ଆଖିରେ ତାହାର ଭରି ସେ ରଖିଛି

     ଯୁଗ ଯୁଗ ପାଇଁ ଆଶା |

ବାରବରଷର ବିଚ୍ଛେଦ ର ଜ୍ୱାଳା

     ଛାଡି ପ୍ରଣୟିନୀ ଦୂରେ,

ନପାଇ ପୀରତି ସତେ କି ଯେମିତି

      କରିଛି ପ୍ରୀତି ପ୍ରସ୍ତରେ |

କଠିନ ପ୍ରସ୍ତରେ ଖୋଦିଛି କଷ୍ଟରେ

      ନଗ୍ନନଟୀ ପ୍ରୀତିଆଶେ,

ମନର କାମନା ଅଜାଡି ଦେଇଛି

      ସତେକି ଅକୁହା ଭାଷେ |

ଅବୁଝା ରାଜା ଯେ ବୁଝିଲେନି କିଛି

      ପ୍ରୀତିପ୍ରଣୟର କଥା,

ଶିଳ୍ପୀ ହୃଦୟରେ ଜମା ହେଉଥିଲା

      ପ୍ରିୟା ବିରହର ବ୍ୟଥା |

ବାରଶହ ଶିଳ୍ପୀ ଗଢ଼ିଦେଇଥିଲେ

       ସତେ କି ବିରହେ ଭାଳି,

ସେଥିପାଇଁ କିବା ଭଗ୍ନ ସେ କୋଣାର୍କ

       ଶିଳ୍ପୀ ଅଭିଶାପେ ଜଳି |