ଭବ ଜଳୁ ପାରି କର
ଭବ ଜଳୁ ପାରି କର
ରାଧା ହେବନାହିଁ ତୋ ପ୍ରେମରେ କାଳିଆ
କରିପାରିବେନି ରାସ
ମୀରା ପରି ସବୁ ସମର୍ପି ଦେଇ ମୁଁ
ହୋଇଯିବି ତୋର ଦାସ ।
ବନ୍ଧୁ ମହାନ୍ତି ମୁଁ ନୁହଁ ହେ ସାଆନ୍ତ
ଯାଚି ଦେବ ଭୋଗ ଥାଳି
ଅଛବ ମୁଁ ପରା ସିଂହଦ୍ଵାରୁ ତୋତେ
ଦେଖି ଦେଇ ଯିବି ଚାଲି ।
ତପସ୍ୱୀ ଶବରୀ ମୁଁ ନୁହଁ ହେ ରାମ
ଦେବାକୁ ଅଇଁଠା କୋଳି
ଗୁଣ୍ଡୁଚିମୂଷାଟେ ତୁମ ବଡ଼ଦାଣ୍ଡେ
ଧୂଳି ହେଉଥିବି ବୋଳି ।
ସୁଦାମାର ଭାବ ନାହିଁ ବିଶ୍ଵଦେବ
ଖାଇବ ମୋ ହାତୁ ଖୁଦ
ପାଷଣୀ ଅହଲ୍ୟା ତୁମ୍ଭ ବାଟ ଚାହେଁ
ଉଦ୍ଧାରିବ ବାସୁଦେବ ।
ମୁଁ ତ ଅକିଞ୍ଚନ ଅତି ମୂଢ ଜନ
ଜାଣିନାହିଁ ଭକ୍ତି ସ୍ତୁତି
ସମର୍ପି ଦେଇଛି ଚିତ୍ତ ତୋ ଚରଣେ
ଅଖିଳ ବ୍ରହ୍ମାଣ୍ତ ପତି ।
ଶିରେ କର ଯୋଡ଼ି ପଦ୍ମପାଦେ ପଡି
ଡାକେ ଆହେ ଚକ୍ରଧର
ଅରକ୍ଷ ରକ୍ଷଣ ଆରତ ନାଶନ
ଭବ ଜଳୁ ପାରି କର ।