ଭାରତର ଅମୃତ ସନ୍ତାନ କଲାମ

  

ପ୍ରତି ଭାରତୀୟ ହୃଦୟେ ଅଙ୍କିତ

      ଅମ୍ଲାନ ତୁମରି ଛବି,

ଅବଦୁଲ କଲାମ ନାମେ ପରିଚିତ

      ସତେ କି ଭାରତ ରବି |

ତୁମରି କର୍ମର ଆଲୋକ ଶିଖାରେ

      ଗର୍ବିତ ଭାରତ ଆଜି,

ଶତ୍ରୁ ହୃଦୟରେ ଭୟର ତାଣ୍ଡବ

       ଗର୍ବ ଯାଉଅଛି ଭାଜି |

ତୁମେ ବୈଜ୍ଞାନୀକ ଭାରତ ମାଟିର

      ମିସାଇଲର ଜନକ,

ଅନ୍ତରିକ୍ଷ ଜ୍ଞାନ ସବୁ ତ ଦେଇଛ

      ହୋଇଛ ଦେଶେ ମହାନ |

ସୁଶାସକ ଭାବେ ଦେଲ ପରିଚୟ

       ଆଦ୍ୟ ନାଗରିକ ଭାବେ,

ଭାରତ ବର୍ଷର ରାଷ୍ଟ୍ରପତି ହେଲ

       ଛାତି ଫୁଲିଉଠେ ଗର୍ବେ |

ତୁମେ ପରା ଅଟ ସ୍ବର୍ଗୀୟ ପୁଲକ

      ଏ ମାଟି ଫୁଲର ବାସ,

ଯୋଗ୍ୟ ସନ୍ତାନର ପରିଚୟେ ପରା

       ଉଲ୍ଲସିତ ଆମ ଦେଶ |

ତୁମେ ଥିଲ ପରା ପରମ ତପସ୍ୱୀ

       ଜୀବନରେ କର୍ମବୀର,

ସମୟ ପାଇନ ଖୋଜିବାକୁ ପରା

       ହୃଦୟେ ପ୍ରୀତିର ସ୍ୱର |

ତୁମରି ଦରଦ ଫୁଟି ଉଠୁଥିଲା

       ଏ ଦେଶର ଶିଶୁ ପାଇଁ,

ତୁମରି ହାତର ପରଶେ ସରଗ

       ସୁଖ ଉଠୁଥିଲା ଚେଇଁ |

ସମୟ କବଳେ ତୁମେ ମିଶିଗଲ

       ମାଆ ମାଟି କୋଳେ ପରା,

ସବୁରି ହୃଦୟେ ରହିଛ ରହିବ

       ଥିବା ଯାଏ ଏଇ ଧରା ।।