ଭାରତବର୍ଷର ଅମୂଲ୍ୟ ଶିରୀ

ଧନ୍ୟ ମୋର ଦେଶ ପୂରୁବ ପୁରୁଷ

ଗଢିଯାଇଛନ୍ତି କୀରତ୍ତିରାଜି

କଳା ସଂସ୍କୃତିର  ସାକ୍ଷ ଦେଉଛନ୍ତି

କୋଣେଅନୁକୋଣେ ନୀରବେ ଆଜି

ମନ୍ଦିର ମସଜିଦ କୋଠାବାଡି ସ୍ତମ୍ଭ

ଗୁମ୍ଫା ଦେହେ ପୂର୍ଣ୍ଣ କଳାଚାତୁରୀ

ଆଚମ୍ବିତ ଭାରି ଦେଖିଲେ ଲାଗଇ

ଭାରତବର୍ଷର ଅମୂଲ୍ୟ ଶିରୀ

ଆଗ୍ରାରେ ନିର୍ମିତ ତାଜମହଲର

ଅନନ୍ୟ ଅପୂର୍ବ କଳାକୌଶଳ

ବିଶ୍ୱ ଦରବାରେ ସୁନାମ ଅର୍ଜିଛି

କାରୀଗରଙ୍କର ଶ୍ରମର ଫଳ

କୋଣାର୍କ ବକ୍ଷରେ ସୂର୍ଯ୍ୟ ମନ୍ଦିରରେ

ଶିଳାରେ ଖୋଦିତ ନାନାଦି ମୂର୍ତ୍ତୀ

ଅନୁପମ ଶୋଭା ଭାରି ମନଲୋଭା

ବହନ କରିଛି ଅତୀତ ସ୍ମୃତି

ଏଲୋରାରେ ସ୍ଥିତ କୈଳାସ ମନ୍ଦିର

ବିଜାପୁର ସ୍ଥାନେ ଗୋଳଜମ୍ବୁଜ

ଅମ୍ଳାନ କୀରତ୍ତି କୁତବ ମିନାର

ଅଦ୍ୱିତୀୟ ସଦା ସେ କାରୁକାର୍ଯ୍ୟ

ସବୁଠୁ ନିଆରା ଲାଲକିଲ୍ଲା କଳା

ଦେଖଣାହାରୀଙ୍କୁ କରେ ଚକିତ

ମିନାକ୍ଷୀ ମନ୍ଦିର କଳାର ସମ୍ଭାର

ପୁରୁଣା ହୋଇବି ଆଜି ଅକ୍ଷତ

ସର୍ବ ପୁରାତନ ଭାରତର ମାନ

ବହନ କରୁଛି ଅଶୋକସ୍ତମ୍ଭ

ଉତ୍କର୍ଷ କଳାର ନିଦର୍ଶନ ରୂପେ

ଭାରତୀୟଙ୍କର ଗର୍ବଗୌରବ

ଯୁଗ ଯୁଗ ଧରି ଭାରତୀୟ କଳା

ଦେଶବାସୀଙ୍କର ମୁଖ୍ୟ ସମ୍ପତ୍ତି

ଅମୂଲ୍ୟ ଅପୂର୍ବ କୀର୍ତ୍ତିରାଜି ବଳେ

ସମୃଦ୍ଧ ହୋଇଛି ଆମ ସଂସ୍କୃତି