ଭାରି ସୁନ୍ଦର ମୋ ଗାଁ

ଏପଟେ ପହାଡ ସେପଟେ ଝରଣା

ମଝିରେ ଆମରି ଗାଁ

ସୁନ୍ଦର ଯେମିତି ମଧୁର ସେମିତି

ତହାରି ଛୋଟିଆ ନାଁ ।

ସରଗଠୁ ବଳି ଏଇ ଗାଁ ମୋର

ଆଖି ରହିଯାଏ ଲାଖି 

ବାଟଘାଟ ତୁଠ ସବୁତ ସୁନ୍ଦର

ମନ ପୂରିଯାଏ ଦେଖି ।

ଋତୁପରେ ଯେବେ ଆସେ ନୂଆ ଋତୁ

ବଦଳେ ମୋ ଗାଁ ରୂପ

ଖରା ପରେ ବର୍ଷା ଶରତ ହେମନ୍ତ

ଶୀତ କହେ ନୂଆ ଗପ ।

ଭାଇଚାରା ଆମ ଗାଁ ଗଉରବ

ଏକତାର ରଙ୍ଗ ବୋଳା

ସୁସ୍ଥ ରହିବାର ସରଳ କଥାରେ

କରନ୍ତିନି କେହି ହେଳା ।

ନଳକୂଅ ପାଣି ପିଅନ୍ତି ସଭିଏଁ

ଶୁଅନ୍ତି ମଶାରୀ ଟାଣି

ଗୁଣ୍ଡି ଗୁଟୁକା ମୋ ଗାଁରେ ବାରଣ

ଆକଟ ତ ନିଶାପାଣି ।

ଧନୀ ହେଉ ଅବା ହେଉରେ ଗରିବ

ଘରେଘରେ ପାଇଖାନା 

ନଳକୂଅ ମୂଳ ନଈନାଳ କୂଳ           

   ଅସନା କରିବା ମନା ।

ନାଳ ନରଦମା ସବୁ ଆମ ସଫା

 ଗଡିଆରେ ଦଳ ନାହିଁ 

କାଚକେନ୍ଦୁ ପାଣି ମନ ନିଏକିଣି

ଫୁଟେ ଯେବେ ନାଲି କଇଁ ।

ଖାଲଖମା ସବୁ ଦେଇଛୁ ତ ପୋତି

ଜମୁନାହିଁ କାହିଁ ପାଣି 

ଯହିଁ ଥିଲା ଯେତେ ପଡିଆ ଜମିତ

ଗଛ ପୋତିଦେଲୁ ଆଣି ।

ମିଳିମିଶି ଆମେ ସୁତୁରା ରଖୁଛୁ

ଘର ଆମ ପରିବେଶ 

ସଫାସୁତୁରା ତ ସୁଖଶାନ୍ତି ଆଣେ

ହସି ଉଠେ ଗାଁ ଦେଶ ।

ସଫାସୁତୁରା ତ ସୁସ୍ଥ ରହିବାକୁ

ସଭିଙ୍କୁ ଦେଖାଏ ବାଟ 

ସବୁଦିନ ବହେ ଚଇତି ପବନ

ଗାଇ ଗାଇ ମିଠା ଗୀତ ।

ଛୋଟ ଛୋଟ କଥା ମାନିଛୁ ବୋଲିତ

ମୋ ଗାଁ ଲାଗଇ ଭଲ

ତୁଛାଟାରେ କେହି ରୋଗ ବେମାରୀରେ

ହୁଅନ୍ତିନି କଲବଲ ।