ଭାରି ମିଠା ଲାଗେ ତୁମ ମିଛି ମିଛିକା

ଭାରି ମିଠା ଲାଗେ ତୁମ ମିଛ ରାଗ

   କେତେ ଖୁସି ଲାଗୁଥାଏ

ସେଇ ଖୁସି ଟିକେ ପାଇବାର ପାଇଁ 

   ତୁମକୁ ଚିଡେଇ ଦିଏ ।

ରାଗି ଗଲେ ତୁମେ କେତେ ବକି ଯାଅ

   ନୀରବତା ଭାଙ୍ଗି ଥାଏ

ସେଇ ନୀରବତା ଭାଙ୍ଗିବା ପାଇଁ କି

    ତୁମକୁ ରଗେଇ ଦିଏ ।

ଉପରେ ଉପରେ ରାଗି ଯାଅ ସିନା

    ମନ ତୁମ କଷ୍ଟ ହୁଏ

ସେଇ କଷ୍ଟ ତୁମ ଅନୁଭବ କରି

   ତୁମକୁ ମୁଁ ଭଲ ପାଏ ।

ବେଶୀ ରାଗି ତୁମେ କଥା ନ କହିଲେ

   ଲୁହ ମୋର ଝରି ଯାଏ

ଭୋକ ଶୋଷ ସବୁ ଭୁଲି ଯାଇ ମନ

   ତୁମକୁ ଯେ ଖୋଜି ହୁଏ ।

ମନ ମାନି ଗଲେ ମନେଇ ତ ନିଅ

   ଗେହ୍ଲେଇ ମୁଁ ହେଇଯାଏ

ତୁମ ବାହୁ ଡୋରେ ଛନ୍ଦି ହେଇ ମୁହିଁ 

    ତୁମକୁ ଯେ ଦେଖୁଥାଏ ।

ମିଛି ମିଛିକା ତ ତୁମ ସେଇ ରାଗ 

   ସେଇଠି ଉଭେଇ ଯାଏ

ଭଲ ପାଇବାର ସେଇ ମିଠା ସ୍ମୃତି 

   ହୃଦୟରେ ଆଙ୍କି ଦିଏ ।

ମିଛି ମିଛି ତୁମ ସେଇ ମିଛ ରାଗ

   ପାଖେ ତୁମ ଟାଣି ନିଏ

ତୁମ ମିଛ ରାଗ ଦେଖି ବେଳେ ବେଳେ

    କଟି ମୁଁ ପକେଇ ଦିଏ ।

ମାନ ଅଭିମାନ ରାଗ ରୁଷା ପ୍ରେମ

    ଭାରି ମଜା ଲାଗୁଥାଏ 

ତୁମ ମିଛ ରାଗ କେତେ ମିଠା ଥାଏ

   ସେତେବେଳେ ଜାଣି ହୁଏ ।

କେତେ ଭଲ ପାଅ ହୃଦୟରୁ ମୋତେ

   ତୁମ ରାଗ କହି ଦିଏ

ସେ ଭଲ ପାଇବା ପାଇବାର ପାଇଁ 

    ତୁମକୁ ରଗାଉ ଥାଏ ।