ଭାରି ଚାଲାକ ସୁନି ଆମର

ଶିକ୍ଷକ ଦିନେ ପଢିବା ବେଳେ

କହିଲେ ପିଲେ ଶୁଣ

ଟଙ୍କା ସଞ୍ଚିଲେ ବିପଦ ବେଳେ

କାମରେ ଆସେ ଜାଣ ।

ଟିକେ ଚଗଲା ନାମ ବାବୁଲା

ଝଅଟ ଠିଆ ହୋଇ

ବୁଝାଇ ଟିକେ କୁହନ୍ତୁ ଭଲା

କହିଲା ହସି ଦେଇ ।

ଗୁରୁଜୀ ଟିକେ ନୀରବ ରହି

ଆରମ୍ଭ କଲେ ଗପ

ଭାରି ଚାଲାକ ସୁନି ଆମର

ବୟସ ତା'ର ଅଳ୍ପ ।

ସଭିଏଁ ତାକୁ ଆଦର କରି

ଦିଅନ୍ତି କିଛି ଟଙ୍କା

ଘଡିରେ ସିଏ ସାଇତି ରଖେ

ପାଇ ବୋଉର ଶିକ୍ଷା ।

ବାପାଙ୍କ ଦେହ ଖରାପ ହେଲା

ପାରିଲେ ନାହିଁ ଚାଲି

ଡାକ୍ତରଖାନା ଯିବା ପାଇଁକି

ହୋଇଲେ ଖାଲି ଭାଳି ।

ନଥିଲା ପାଶେ ଟଙ୍କା ଜମାରୁ

କେମିତି ଯିବେ ସିଏ

ଶୁଣିକି ସୁନି ଘଡିକୁ ତା'ର

ବୋଉକୁ ନେଇ ଦିଏ ।

ସଞ୍ଚୟ କରି ରଖିଚି ଟଙ୍କା

ଘଡିରେ ଯାହା ମୋର

ଔଷଧ କିଣି ଆଣିବା ଆମେ

ରୋଗ ହୋଇବ ଦୂର ।

ବୁଝିଲେ ପିଲେ ସଞ୍ଚୟ ମୂଲ

ଖୁସିରେ ତାଳି ମାରି

ଆଜିଠୁ ଆମେ ସଞ୍ଚିବୁ ଟଙ୍କା

କହିଲେ ହୋଇ ମେଳି ।