ଭାବନା

ତୁମ ପାଇଁ ଯଦି     ସାଜନ୍ତି ଚାମଚେ

ସୁଲଭ ସ୍ଵାଦିଷ୍ଟ ଚିନି

ଗୋରସରେ ଘୋଳି   ପିଇ ନେଇଥାନ୍ତ

ପାରି ନଥାନ୍ତ ବି ଚିହ୍ନି ।

ସେହି ମଧୁଚଖା      ଦୁଇ ଓଠଧାର

ଯାଉଥାନ୍ତା ଯେବେ ଲାଖି

ଭାବନାରେ ମୋର    ବିମ୍ବାଧରୀ ତୁମ

ଲାଲିମା ନିଅନ୍ତି ମାଖି ।

ତୁମ ଚଲାପଥେ    ପାହାଡ଼ଟେ ଭଳି

ହୋଇଥାନ୍ତି ଯଦି ଠିଆ

ଚଢ଼ି ଯାଇଥାନ୍ତ    ଜାଣିଥାନ୍ତି କେତେ

କମ୍ପିଥାନ୍ତା ତୁମ ହିଆ ।

ଚଢ଼ିଯିବା ପରେ      ଉପରୁ ତଳକୁ

ଆସିଥାନ୍ତ ଯେବେ ଖସି

ସମତଳ ହୋଇ      ବିସ୍ତାରନ୍ତି ତୁମ

ପାଦତଳେ ହସି ହସି ।

ଇଚ୍ଛା ହୁଏ ତୁମ     ବାଟର କଡ଼ରେ

ଶିମିଳି ଗଛଟେ ହୋଇ

ଥକି ଯିବା ଦେଖି     ବିଛାଇ ଦିଅନ୍ତି 

ତୂଳାରେ ଯାଆନ୍ତ ଶୋଇ ।

କୋମଳ ଦେହର    ସୁଗନ୍ଧ ନେଇ ମୁଁ

ପବନେ ଯାଆନ୍ତି ଉଡ଼ି

ତୁମ ଘରପଛ      ରସାରେ ମିଶନ୍ତି

ଭାବନାରସରେ ବୁଡ଼ି ।

ତୁମରି ଆର୍ଦ୍ରତା     ଉଷ୍ମତା ପାଇ ତ

ଯାଇଥାନ୍ତି ଦିନେ ଫାଟି

ଅଙ୍କୁରିତ ହୋଇ      ବଢ଼ନ୍ତି ଚଞ୍ଚଳ

ଫଗୁଣେ ହସନ୍ତା ବାଟୀ ।

ଭାବନାରେ ମଜ୍ଜି   ଦିଶିଯାଏ ଯେବେ

ମୁକ୍ତକେଶା ତୁମ କାୟା

ଇଚ୍ଛା ହୁଏ ଟିକେ    ଶାନ୍ତିରେ ଶୁଅନ୍ତି

ଆବୋରି ଶୀତଳ ଛାୟା ।