Library
Profile
ଭାବନା ନିର୍ଝର
ଭାବନା ନିର୍ଝର
ଆଶା ଲଫାଫାରେ ଦେଲି ପୁରେଇ
ସୁନାରଙ୍ଗିଆ
ବହେ ଇଛାକୁ ମୋର
ଜାଣିଥିଲି ଫଳବତୀ ହେବନି
କେବେ ଆଶା ତରୁବର
ତଥାପି
ସାହସ ଜୁଟେଇ
ନିରୋଳା ନିଃସଙ୍ଗ ବେଳାରେ
ଭାବୁଥିଲି କଠା କଠା
ଅତୀତ ତଥା
ଆଗାମୀ ଦିନର କଳ୍ପଚିଠା
ଲେଖୁଥିଲି ପୃଷ୍ଠା ପୃଷ୍ଠା
ଅଟ୍ଟହାସ୍ୟ କରୁଥିବା କିଛି
ଶେଷ ଦିବାସ୍ଵପ୍ନର
କ୍ଷଣଭଙ୍ଗୁର ସ୍ମୃତି ଖଟା ମିଠା
ଆଉ ଜାଣିଲେ ହସିବେ ସର୍ବଜନ
ସାଇତି ରଖୁଥିଲି
ମୋର ସେହି ସୁନେଲି ଲଫାଫାର
ନିଭୃତ ବକ୍ଷରେ
କଡ଼ ଲେଉଟୁଥିବା
ଅୟୁତ ନିୟୁତ ବନ୍ଧ୍ୟା ଇଚ୍ଛାଫୁଲମାନ
ଜାଣିନି କାହିଁକି କେଜାଣି
ଏମିତି ଅଭ୍ୟାସ ପାଳିଥିଲି
ଏମିତି ବଦଭ୍ୟାସର ପିଠିରେ
ଆଙ୍କୁଥିଲି ଅସମ୍ଭବ ଅସଙ୍ଗତ କଳ୍ପନା ଜାଲ
କେହି ପଚାରି ଦେଲେ
ଅବଶ୍ୟ ଉତ୍ତର ନ ଦେଇ
କେବଳ ମୁରୁକେଇ ଦେଇ
ଛତ୍ରଭଙ୍ଗ ଦେଉଥିଲି
ଆଦୌ ଲାଗୁ ନଥିଲା ଭଲ
ପଳାତକ ଘୋଷିତ ନ କଲେ ବି
ମନେ ମନେ ଭାବୁଥିଲି ଏମିତି
ଭାବନା ସବୁ ସମୟ ସମୟରେ
ଦାନ୍ତ ଦେଖେଇ ସାରିବା ପରେ
ଲାଗେ କେମିତି କେମିତି
ନ ସରୁ ଏ ଭାବନା ନିର୍ଝର
ଏ ମରୁ ଏ ଇଚ୍ଛା ସରୋବର
ଲୋକେ କୁହନ୍ତୁ ପଛେ ବଦ୍ଧ ପାଗଳ
ନସ୍ବର ଜୀବନର କିସ ବା ଭରସା
ଖୁସି ବଳୟରେ ବି ଝରେ ଗରଳ
କିଏ ପ୍ରଜ୍ଞା ପ୍ରଳାପ ପାଗଳ
କିଏ ପ୍ରେମ ପ୍ରତିଜ୍ଞା ପାଗଳ
କିଏ ଧନ ଦୌଲତ ପାଗଳ
କିଏ ପଦ ପ୍ରତିଷ୍ଠା ପାଗଳ
ଧାଉଁ ଧାଉଁ ସରିଯିବ ଜୀବନ ଖେଳ
