ବେତାର ଯନ୍ତ୍ର

ଆଜି ସିନା ନାହିଁ ବେତାର ଯନ୍ତ୍ରର

          ଆଗ ଭଳି ଆଦରତା,

ଦିନ ଥିଲା କିନ୍ତୁ ଘରେ ଘରେ ଥିଲା

          ରେଡ଼ିଓର ସ୍ୱତନ୍ତ୍ରତା ।

ମନୋରଞ୍ଜନର ପ୍ରଥମ ମାଧ୍ୟମ

          ଥିଲା'ତ ଏହି ଯନ୍ତ୍ରଟା,

ଉପାଦେୟ ବାର୍ତ୍ତା ସଠିକ୍ ସମୟେ

          ପ୍ରଯୁଜ୍ୟ ମିଳେ ଯେଉଁଟା ।

ପାଣିପାଗ ପୁର୍ବ ସତର୍କ ସୂଚନା

           ମିଳେ ଉଚିତ୍ ବେଳରେ,

ଗୀତ ଠାରୁ ନେଇ ଗୀତିନାଟ୍ୟ ଯାଏଁ

        ଭଲ ଲାଗେ ସେ' ସମୟରେ ।

ଦେଶ ବିଦେଶର ଗୁରୁତ୍ଵ ସୂଚନା

           ରେଡିଓରୁ ମିଳୁଥିଲା,

କୃଷି ଠାରୁ ନେଇ ଯୁଦ୍ଧକ୍ଷେତ୍ର ଯାଏଁ

            ଖବର'ତ ଦେଉଥିଲା ।

ଶିଶୁ ଓ କିଶୋର ଯୁବା ଠାରୁ ବୃଦ୍ଧ 

           ସଭିଙ୍କ ପ୍ରିୟ ବେତାର,

ସମୟ ସହିତ ବଦଳି ଯାଇଛି

           ଆଜି ହୋଇଛି ବେକାର ।