ବେସୁରା ଗୀତି-୭୩୪

ସବୁ ତୁଳନାରେ ଅତୁଳନୀୟା ତୁ

ବର୍ଷା ଲୋ ନିରିମାଖି

ସବୁ ଉପମାରେ ଅନୁପମା ତୁହି

ଦେଖିଛି ଯାହା ମୋ ଆଖି ॥

ଅମାନିଆଁ ପଣ ତୋହର କାହିଁକି

କରେ ମୋତେ ଆନମନା

ତୋ ଅବୁଝା ପଣେ ବାନ୍ଧିଛୁ ମୋତେ ଲୋ

ମୁକୁଳି ପାରୁନି ଜମା ॥

ଥିରି ଥିରି ହୋଇ ଆସୁ ଯେତେବେଳେ

ଚହଲାଇ ଦେଉ ମନ

ଘଡଘଡି ଶବ୍ଦେ ଆସୁ ଯେତେବେଳେ

ଥରିଯାଏ ଶିରାବଣ ॥

ତୋ ଆଖିରେ ଯେବେ ଚମକେ ବିଜୁଳି

ହଜିଯାଏ ମନ ମୋର

ଘୋର ରଡି ଛାଡି ବର୍ଷିଯାଉ ଯେବେ

ଘୋଟିଯାଏ ଅନ୍ଧକାର  ॥

ଥିରି ଥିରି ପାଦେ ଆ ଲୋ ବରଷା

ଛୁଇଁଦେ ସଭିଙ୍କ ପ୍ରାଣ

ତୋ ଛୁଆଁରେ ହସୁ ଏ ସାରା ଦୁନିଆ

ହସୁ ମୋର ଦେହ ମନ ॥