ବାସନ୍ତୀକ ଦେବୀ ପୂଜା
ବାସନ୍ତୀକ ଦେବୀ ପୂଜା
ଚୈତ୍ର ଶୁକ୍ଳ ପ୍ରତିପଦ ଠାରୁ ନବମୀ ପର୍ଯ୍ୟନ୍ତ
ବାସନ୍ତୀକ ଦେବୀ ପୂଜା ଅନୁଷ୍ଠିତ
ଏ ସମୟେ ବସନ୍ତ ଋତୁର ମନୋରମ ଦୃଶ୍ୟ
ସହ ପର୍ବ ହର୍ଷ ଉଲ୍ଲାସେ ପାଳିତ ।
ଶୈଳପୁତ୍ରୀ ବ୍ରହ୍ମଚାରିଣୀ ଚନ୍ଦ୍ରଘଣ୍ଟା କୁଷ୍ମାଣ୍ଡ
ସ୍କନ୍ଦମାତା କାତ୍ୟାୟନୀ କାଳରାତ୍ରୀ
ମହାଗୌରୀ ସିଦ୍ଧି ଦାତ୍ରୀ ରୁପେ ପୂଜା ମଣ୍ଡପରେ
ପୂଜା ଆରାଧନା ବିଧାନ ସଂପ୍ରତ୍ତି ।
ଉମା କାତ୍ୟାୟନୀ ଗୌରୀ କାଳୀ ହୈମବତୀଶ୍ୱରୀ
ଶିବା ଭବାନୀ ରୁଦ୍ରାଣୀ ଓ ସର୍ବାଣୀ
ସର୍ବ ମଙ୍ଗଳା ଅପର୍ଣ୍ଣା ପାର୍ବତୀ ଦୁର୍ଗା ମୃଡାନୀ
ଚଣ୍ଡିକା-ମ୍ବିକା ଭାବେ ପରିଚିତ ପୁଣି ।
କାଳ ଅକାଳ ସବୁବେଳ, ମା ଅମ୍ବିକାଙ୍କ କୃପା
ଜଗତ କଲ୍ୟାଣ ନିମନ୍ତେ ରହିଛି
ଭକ୍ତି ଭାବ ଥାଇ ହୃଦେ ଧ୍ୟାନ କଲେ ନିରନ୍ତର
ଦୁଃଖ କଷ୍ଟ ପାପ ଦୂର ହେଉଅଛି ।
ଅକାଳରେ ଶ୍ରୀରାମ ଅକାଳରେ ସିତା ମାତା
ମା ଦୁର୍ଗାଙ୍କ କରିଥିଲେ ଆରାଧନା
ରାବଣ ନିଧନ ପାଇଁ ଆଶିଷ କରିଲେ ପ୍ରଦାନ
ଦେବୀଙ୍କ ନାମରେ ଉଡୁଅଛି ବାନା ।
ସୃଷ୍ଟି ପ୍ରାରମ୍ଭରୁ ଆଦ୍ୟାଶକ୍ତି ଯୋଗମାୟା ଦୁର୍ଗା
ମହାମାୟୀ ମହାଶକ୍ତି ବ୍ରହ୍ମଶକ୍ତି
ଦୁର୍ଗତିନାଶିନୀ ଜଗତ ଜନନୀ ଦେବୀ ଦୁର୍ଗା
ଦେବୀ,ଆଦି ଓ ଅନ୍ତ,ପାଳନକର୍ତ୍ତ୍ରୀ ।
ସୃଜନ କାଳେ ମହାସରସ୍ଵତି ପାଳନ ବେଳେ
ମହାଲକ୍ଷ୍ମୀ, ବିନାଶ ରେ ମହାକାଳୀ
ସମସ୍ତ ନାରୀ ଜାତିର ହିଁ ଅନ୍ତର୍ନିହିତ ଶକ୍ତି
ଅଷ୍ଟାଦଶ ଭୁଜା ମହାମାୟା କାଳୀ ।
ଦ୍ଵାପରରେ ଦେବୀ ଦୁର୍ଗା ହିଁ ଯୋଗ ଶକ୍ତି ବଳରେ
ଦେବକୀ ଙ୍କ ସପ୍ତମ ଗର୍ଭ ହରଣ
ରୋହିଣୀ ଗର୍ଭରେ ରଖି କଂସ ନିଧନର ରାସ୍ତା
ଯୋଜନା ଭିତ୍ତିରେ ହୋଇଲା ଭିଆଣ ।
ତ୍ରେତୟା ରେ ସିତା ମାତା ଆରାଧନା ଶୁଣି ଦୁର୍ଗା
ପୁଷ୍ପ ଧନୁ ତହୁଁ କରିଲେ ପ୍ରଦାନ
ସେହି ପୁଷ୍ପ ଧନୁ ସାହାଯ୍ୟରେ ଶ୍ରୀରାମ ବିଜୟୀ
ପ୍ରତାପୀ ରାବଣ ହୋଇଲା ନିଧନ ।
ଅନନ୍ତ ଶକ୍ତି ସ୍ୱରୁପିଣୀ,ମଙ୍ଗଳ ଦାୟିନୀ ମା
ଜଗତ ଓ ଦେବୀ ଦେବତା ନିମନ୍ତେ
ମଧୁ କୈଠଭ, ମହିଷାସୁର,ଶୁମ୍ଭ ନିଶୁମ୍ଭ ର
ପ୍ରାଣ ନାଶ କରିଥିଲେ ନିଜ ହାତେ ।
ପୂଜା ମଣ୍ଡପରେ ସେହି ମହିଷାସୁର ମର୍ଦ୍ଦିନୀ
ବିଜେ କରୁଛନ୍ତି ପ୍ରତି ପାର୍ବଣରେ
ବହୁ ଆଡମ୍ବର ଆଉ ଭକ୍ତି ଭରା ହୃଦୟରେ
ପର୍ବ ଉତ୍ସବ ହୁଏ ପୁର ପଲ୍ଲୀରେ।
ଦେବୀ ଦୁର୍ଗା ମା,ପାର୍ବଣ ର ଏ ଖୁସି ମୁହୂର୍ତ୍ତରେ
ହୃଦୟ ରୁ ଭକ୍ତି ସହ ନିବେଦନ
ଦେବୀ ଆରାଧନା ନାମରେ ଏ ସମାଜର ଚିତ୍ର
ତୁମ ପାଦ ତଳେ କରୁଛୁ ଅର୍ପଣ ।
ଦେବୀ ଆରାଧନା ନାମରେ ବି ନବରାତ୍ରୀ ପୂଜା
ଦେବୀ ମା'ଙ୍କ ନବ ରୂପ କୁ ସଜାଇ
ଏକ ଖୁସିର ବାତାବରଣ ଏ ଧରା ଧାମରେ
ସବୁ ଦେଖାଣିଆ ଭକ୍ତି ଭାବ ନାହିଁ।
ନିରୀହ ପଶୁ ପକ୍ଷୀଙ୍କ ଜୀବନ ବିନିମୟରେ
ପାର୍ବଣ ଉତ୍ସବ ହେଉଛି ପାଳନ
ମଦ ମାଂସର ସମ୍ଭାର ପ୍ରାୟ ଘରେ ଓ ବାହାରେ
ନାରୀ ନିର୍ଯାତନା ପ୍ରତି ମୁହୂର୍ତ୍ତରେ।
ମାନବିକତାର ସ୍ଥାନ ନେଇଛି ପାଶବିକତା
ଏଠି ମା ଝିଅ ବୋହୂ ଅସୁରକ୍ଷିତ
ଦେବୀ ର ଅନ୍ୟ ରୂପ ନାରୀ ଆଜି ବି ପରାଧୀନ
ପ୍ରଗତି ର ଆଢ଼ୁଆଳେ ଉପେକ୍ଷିତ।
ଅଗଣିତ ରାବଣ ମହିଷାସୁର ଠୁ ଅଧିକ
ଆଜି ସମାଜର ପ୍ରତ୍ୟେକ କ୍ଷେତ୍ରରେ
ଆଉ କେଉଁ ରୂପରେ ଆସିବ ଏ ଧରା ଧାମକୁ
ଏଠି ପ୍ରଦୂଷଣ ପାଣି ପବନରେ ।
ନାରୀଙ୍କୁ ଉଲଗ୍ନ କରିଣ ଦିନ ଦ୍ବିପହରରେ
ଆମେ କେଉଁ ଦେବୀ ପୂଜା କରୁଅଛୁ
ନିର୍ଯାତନା,ବଳାକ୍ରାର ,ଦୁଷ୍କର୍ମ ପ୍ରାୟ ରହିଛି
ନାରୀ ଜାତିକୁ କିଆଁ ଦେବୀ କହୁଛୁ ।
ମା ଦୁର୍ଗା , କଳି ଯୁଗ ଅସୁର ଉତ୍ପାତ ହେଲେଣି
କୃପାକରି ମର୍ଦ୍ଦନ ହେଉ ମର୍ତ୍ତ୍ୟରେ
ଆସ ଅବତରି ମାଆ,ଜୟ ଦେବୀ ଦୁର୍ଗାଙ୍କର
ଶାନ୍ତି ପ୍ରେମ ରହୁ ଏହି ଜଗତରେ ।
କାଳ ହେଉ କି ଅକାଳ, ଦେଵୀ ଦୁର୍ଗା ହିଁ ଭରଷା
ରକ୍ଷା କର ପାପୀ ମାନଙ୍କ ଦାଉରୁ
ନାରୀ ଜାତି ର ସୁରକ୍ଷା ହେଉ ଏହି ସମାଜରେ
ଅତ୍ୟାଚାର ଲୋପ କର ପୃଥିବୀରୁ ।
ଆମ ମା,ଝିଅ,ବୋହୂ,ସ୍ତ୍ରୀ,ଦେବୀଙ୍କର ଅନୁରୂପ
ସମ୍ମାନର ସହ ରହୁ ସମାଜରେ
ଲୋଲୁପ ଦୃଷ୍ଟି କାରୀ ଙ୍କୁ ଉପଯୁକ୍ତ ଦଣ୍ଡ ହେଉ
ଦେବୀଙ୍କ ପୂଜନ ହେଉ ଘରେ ଘରେ।