ବାପାର୍ ଖନେ ଯାତରା ଦେଖା
ବାପାର୍ ଖନେ ଯାତରା ଦେଖା
କେତେ ବନେଥିଲା ଛୁଆବେଲର୍ ଦିନ୍
ବାପା ସାଙ୍ଗେ ଯାତରା ଦେଖା,
ଖନ୍ ଉପୁରେ ତାକର୍ ବସିକରି
ମଜା ଲାଗୁଥିଲା ଯାତରା ଦେଖା ।
ଭିଡ୍ ଭାଡ୍ ହେଇଗଲେ କେନୁ ଟିକେ
ହାତ୍ କେ ଧରୁଥିଲେ ମୋର୍,
କହୁଥିଲେ ବାବୁରେ
ଗୋଡ୍,ହାତ୍ ଚିଆଲନ କାଏ ତୋର୍।
ଆ ମୋର୍ ଖନ୍ ଉପୁରେ ବସି
ଦେଖାମି ଚାରି ଦିଗେ ତତେ,
ଯେତେବେଲେ ଭୋକ୍ ଲାଗ୍'ଲେ
କହେବୁ ବାବୁରେ ମତେ ।
ବୁଲି ବୁଲି କରି ଦେଖୁଥିଲି ସବୁ
ବାପାର୍ ଖନ୍ ଉପୁରେ ବସି,
ଯେତେ ଦରଦ୍ ହେଲେବି ବାପାକେ
ମତେ ଦେଖି ଦେଉଥିଲେ ହସି ।
ନାଇଁ ପାରୁଥିଲି ଜାଣି ଦରଦ୍ କାଣା ଯେ
ମନ୍'କେ ମନ୍ ଦେଖୁଥିଲି,
ମିନାବଜାର୍ ଠାନେ ଗାଡି,ମଟର୍ ଥି
ପଇସା ଦେଇ ବସୁଥିଲି ।
ଖାଇ ଖାଇ ମୋର୍ ପେଟ୍ ପୁରିଗଲେ
ଆଉ ଖାଏବୁ କାଏଁ କହୁଥିଲେ,
ବାପା ମୋର୍ ପାନ୍ ଗୁଟେ ଖାଇକରି
ମତେ ପେଟେ ଖୁଅଉଥିଲେ ।
ସୋର୍ ପଡିଗଲେ ସେ ଯାତରା ଦେଖା
ଛୁଆ ହେଇଯାଏତି କାଏ ଭାବ୍'ସି,
ବାପାର୍ ଖନେ ଆର୍ ଥରେ ବସି
ଯାତରା ଦେଖ୍'ତି ହସି ହସି ।