ବାପା

ବାପା ତୁମକୁ ଖୋଜେ ଭଙ୍ଗା ଖେଳନାର
ଅଲୋଡ଼ା ପ୍ଲାଷ୍ଟିକ ଚକରେ
ସେଲୁନ ବାହାରେ ଦୋହଲୁଥିବା କାଠ ବେଞ୍ଚ
ତୁମକୁ ଆଜି ବି ଝୁରେ
ତୁମେ କୁହ, ତା ବୋଉ କହିଛି ଆଗପଟ ଚୁଟି ଟିକେ ଥାଉ l
ପାନଖିଆ ଦାନ୍ତର ସପ୍ତରଙ୍ଗୀ ଛିଟା
ଖୋଲା ଓଠ ଭିତରୁ ଝଟକି ଉଠେ,
କଇଁଚିର କଚକଚ ଶବ୍ଦ ଆଉ ତୁମ ବିରକ୍ତିକର ହସ,
ଆଜି ବହୁତ ମନେ ପଡେ l
ତୁମ ଉଷୁମ କାନ୍ଧରେ ବସିବାର ମଜା,
ମଇଳା ପଇତାରେ ବନ୍ଧା
ଚାବିକାଠିର ଛବି
ଏବେବି ଅଛି ତାଜା l
ତୁମର ଅଇଁଠା ଥାଳିରେ
ଜାଣି ଛାଡିଯାଇଥିବା ତରକାରୀର ସ୍ୱାଦ,
ପୁରୁଣା ସାଇକେଲର ଚେନ ଭିଡୁଭିଡୁ ତୁମର
ମୁରବିପଣିଆର ରାଗ
ଆଜି ବି ମନେପଡେ l
ଜହ୍ନମାମୁଁ ଆଣିଦବାକୁ
କେବେ କହିନ ତ ସତ,
କିନ୍ତୁ ଡାକ୍ତର ପାଖରେ ତୁମର କାକୁତି ମିନତୀ
ସତରେ ଆଜିବି ଅଚ୍ଛି ମନେ l
ତୁମ ଟ୍ୟୁସନ ମାଷ୍ଟ୍ର ଖୋଜା,
କଲେଜ ଫିସର ବକେଆ ପଇସାରେ
ଚକଲେଟ ଖିଆ ମଜା ,
ମିଛିମିଛିକା ତୁମ ଉଠା ପାହାର,
ତୁମ ପିଠି ଉପରେ ଚାଲିବାର ସଉକ,
ମନେ ଅଛି ମୋର l
କାହିଁକି କେଜାଣି.
ବାପା ! ଆଜି ବହୁତ, ବହୁତ ମନେପଡ ତୁମେ l