ବାପା ବଦଳିଲେ ଝିଅ କଥାରେ

ମୋବାଇଲ ଧରି ଝିଅ ହସିକରି

କହୁଅଛି ଆସି ମାଆକୁ

ବାପା ପକେଟରୁ ଆଣିଛି ମୁଁ ଧୀରେ

କହିବୁନି ଜମା ତାହାଙ୍କୁ ।

ଏଇ ଫୋନଟାକୁ ଦିନରାତି ଧରି

ବାପା ମୋର ଖାଲି ବସୁଚି

କ'ଣ କ'ଣ ଲେଖି ଫଟ ଦେଖିଦେଖି

ମନେମନେ ଖାଲି ହସୁଚି ।

ତୋ ସହିତ ବସି ଖୁସି ଗପ ପାଇଁ

ବେଳ ନାଇ ପରା ବାପାର

ମୋତେ ଟିକେ ଧରି ଗେଲ କରିବାକୁ

ସମୟ ହଉନି ତାଙ୍କର ।

ଆମ ଦୁଃଖ କଥା କଲମ ମୁନରେ

ଆଜିଠାରୁ ଆମେ ଲେଖିବା

ମିଛେ ଶୋଇପଡ ଚୁପଚାପ୍ ହେଇ

ବାପା ଆସୁ ଆଜି ଦେଖିବା ।

ସେ

Advertisement

ତିକି ବେଳକୁ ମନ ଦୁଃଖେ ବାପା

ନିରବରେ ଆସି ବସିଲେ

ମାଆ ଝିଅ ଦୁହେଁ ଠରାଠରି ହେଇ

ମୁରୁକିମୁରୁକି ହସିଲେ ।

ଗେଲେଇ ହେଇକି ପଚାରୁଚି ଝିଅ

ମନ ଦୁଃଖ କିଆଁ କରିଚ

ଘର କଥା କିଛି ବୁଝୁନ ତ ତମେ

ମୋବାଇଲଟାକୁ ଧରିଚ ।

ନିର୍ଜୀବ ଫୋନଟା ଏତେ ଆପଣାର

ପର କରିଅଛ ଆମକୁ

ସେଇଦିନୁ ବାପା କାନକୁ ଧଇଲେ

ହସିହସି ଗଲେ କାମକୁ ।

ଜାଣି ନ ଥିଲେ ସେ ଏତେ ବୁଦ୍ଧି ଅଛି

ତାଙ୍କ ଝିଅ ଟିକି ମଥାରେ

ମୋବାଇଲ ନିଶା ଛାଡିଗଲା ତାଙ୍କ

ବଦଳିଲେ ଝିଅ କଥାରେ ।