ବାଇଚଢେଇ ର ବସା

ପାର ଉଡ଼ିଆସେ ଖୁଣ୍ଟି ଖାଏ ବସେ

ଖୁଦକଣିକା କି ଗୋଡି

ପାକଳ ଫଳକୁ ଖୁମ୍ପିଖୁମ୍ପି ଖାଏ

ଶୁଆସାରି ଯୋଡିଯୋଡି

କାଆ କା କାଉ ହୁଏ ରାଉରାଉ

କହେ ଭାଇ ଉଠିଆ

ରାତିପାହିଲାଣି ସକାଳହେଲାଣି

କାମଦାମେ ଲାଗିଜାଆ

ମହାକାଇ ମଲ୍ଲୀ ମାଳତୀ ସେବତୀ

ଚହଟାଇ ଦିଏ ଧରା

ସିନ୍ଦୁର ଫରୁଆ ଧରି ଦିନନାଥ

ବରିବେ ଦେବୀକୁଁ ପରା

କଳାଶାଢ଼ୀ କାଢି ରଙ୍ଗିଲା ପାଢ଼ୀରେ

ପାଟରାଣୀ ଉଭାହେବେ

ମଙ୍ଗଳା ମାତାକଂଆରାଧନା କରି

ସୁମଙ୍ଗଲ ମନାସିବେ

ଧୂପଦୀପ ଦାନ ପଞ୍ଚାମୃତ ପାନ

ଶଙ୍ଖଘଣ୍ଟ ଭେରୀତୂରୀ

ଜାଗିଲେ ଜନନୀ ହସିଲା ଧରଣୀ

ବସୁଧା ମାତାର ପୁରୀ

ବଣି ଯୋଡିଯୋଡି ଯାଏ ଡେଇଁଡେଇଁ

ପିଜୁଳି ଡାଇରେ ଟିଆ

ରାତି ଜଗୁଆଳି କୁକୁର ଦୁଆରେ

ମାଗିଲାଣି ଜଳଖିଆ

ଗୋରୁଗାଈ ଦିଏ ଖୁଣ୍ଟରୁ ଫିଟେଇ

ବିଲକୁ ଚାଲିଲା ଚଷା

ସମସ୍ତକୁଁ ନେଇ ସୁନ୍ଦର ଲାଗଇ

ବାଇଚଢ଼େଇର ବସା