ବାଗ୍ଦେବୀ ବନ୍ଦନା
ବାଗ୍ଦେବୀ ବନ୍ଦନା
ବନ୍ଦଇ ଶାରଦା ମାତ ମରାଳ ବାହନୀ
ଶୁଭ୍ର ବସ୍ତ୍ରେ ଭୂଷଣ ମା ଶୁଭ୍ର ପଦ୍ମାସନୀ l
ବୀଣା ପୁସ୍ତକଧାରିଣୀ ବିଶ୍ୱ ଠାକୁରାଣୀ
କି ଭାବେ ବନ୍ଦିବି ମୁହିଁ ନପାରଇ ଜାଣି l
ବାଗ୍ଦେବୀ କଣ୍ଠରେ ବସ ବାକ୍ୟ ଦିଅ କହି
କାବ୍ୟକଳା ଠାକୁରାଣୀ ମାଆ ଦୟାମୟୀ l
ବ୍ରହ୍ମାଣ୍ଡ ଈଶ୍ୱରୀ ମାତ ବିଦ୍ୟା ପ୍ରଦାୟିନୀ
ତୋ ପ୍ରସାଦେ ବାଚାଳ ହୁଅଇ ମୂକ ପ୍ରାଣୀ l
ଶାରଦେ ବରଦେ ମାତ ତୁହି ଜ୍ଞାନଦାତ୍ରୀ
ପରମ କଲ୍ୟାଣୀ ମାତା ତୁହି ଜଗଦ୍ଧାତ୍ରୀ l
ଶିରେ ମୁକୁଟ ଶୋଭଇ ତୋ କର୍ଣ୍ଣ କୁଣ୍ଡଳେ
ଧବଳ କୁସୁମ ହାର ଭୂଷଣ ତୋ ଗଳେ l
ତୋହର ପ୍ରସାଦୁ ମାଆ ଚରଣରେ ଦାସ
ଗଜ ମୂର୍ଖ ମହାକବି ହେଲେ କାଳି ଦାସ l
ମୂର୍ଖ ଶାରଳା ଦାସର କଣ୍ଠେ ମା' ବସିଲୁ
କେତେ ଶାସ୍ତ୍ର ପୁରାଣ ତାହାଙ୍କୁ କହିଦେଲୁ l
ଉତ୍କଳରେ ବ୍ୟାସ ଭକ୍ତ ଜଗନ୍ନାଥ ଦାସ
କୃଷ୍ଣ ରସ ଭାଗବତ କରିଲେ ପ୍ରକାଶ l
ଉତ୍କଳ ବାଲ୍ମୀକି ପୁଣି ଦାସ ବଳରାମ
ଧ୍ୟାୟି ରଚିଗଲେ ଦିବ୍ୟ ଦାଣ୍ଡିରାମାୟଣ l
ବୀଣାବାଦ୍ୟ ବେଦନାଦ ଶୁଭ୍ରହଂସ ତୋର
ନମସ୍ତୁତେ ବନ୍ଦଇ ମା' ତୋହର ପୟର l