ଅଷ୍ଟମ ଗର୍ଭେ ଅଷ୍ଟ ଅବତାର

ଅଷ୍ଟମ ଗର୍ଭରେ ଅଷ୍ଟ ଅବତାର

ଅଷ୍ଟମ ଭଣଜା ମାମୁଁ କଂସଙ୍କର

ଅଷ୍ଟମୀ ଭାଦ୍ରବ ସେ କୃଷ୍ଣ ପକ୍ଷରେ

କୃଷ୍ଣ ଜନମିଲେ ମାମୁଁ ବନ୍ଦୀଶାଳେ ll

ମୁଷଳ ଧାରାରେ ବରଷା ପ୍ରକୋପ

ଘଡଘଡି ଶୁଭେ ସତେ ଇନ୍ଦ୍ର କୋପ

ଜନ୍ମ ନେଲେ ପ୍ରଭୁ କୁଳର ପ୍ରଦୀପ

ଦେବକୀ କୋଳେ ବସୁଦେବ ସମୀପ ll

ଅଷ୍ଟ କଂସମାଲେ ନିଦ୍ରା ଅଚେତନ

ଫିଟିଲା ଶିକୁଳୀ କବାଟ ତତକ୍ଷଣ

ଚତୁର୍ଦ୍ଧା ମୂର୍ତ୍ତିରେ ଦିବ୍ୟ ବିଭୂଷଣ

ବୋଇଲେ କନ୍ୟାକୁ ପାଲଟାଇ ଆଣ ll

ଦିବ୍ୟ ରୂପ ଦେଖି ପିତା କୃତ୍ୟ କୃତ୍ୟ

ମସ୍ତକରେ ଭରି ବସୁଦେବ ସୁତ

ପଦପ୍ରଖାଳନ୍ତେ ଉଗ୍ରସେନ ଦୂତ

କଟୁ ବାଣୀ ଦେଇ ମନ କଲେ ତିକ୍ତ ll

ଉଗ୍ରସେନେ ପ୍ରଭୁ ଦେଲେ ଦିବ୍ୟ ଦର୍ଶନ

ଦର୍ଶନେ ମୁଖରୁ ନ ସ୍ପୁରେ ବଚନ

ଶିରେ ଧରି ବସୁଦେବ ଯମୁନା କୂଳେ

ଢାଙ୍କିଛନ୍ତି ସର୍ପ ରାଜ ତା ଫେଣା ତଳେ ll

ଦ୍ବିଭାଗ ହେଲା ସେହି ଯମୁନା ଜଳ

ବସୁଦେବ ଉପନତ ସେ ଗୋପପୁର

କନ୍ୟା ବଦଳେ ଦେଇ ବାଳ କୁମର

ଅତି ଖରେ ପହଁଚିଲେ ମଥୁରା ପୁର ll

ପାହିଲା ରଜନୀ କଂସ କର୍ଣ୍ଣ ଶୁଣି

ଭଗିନୀ କୋଳରୁ ପୁତ୍ର ଭିଡି ଆଣି

ପୁତ୍ର ନୋହେ ସେହୁ କନ୍ୟାକୁ ଦେଖିଲା

ମାରିବ କି ନାହିଁ ମନେ ବିଚାରିଲା ll

କପଟିଆ କୁଟ କେ ଜାଣିବ ଭଲା

ନାରୀ ରୂପେ ମହିଷାସୁର ବଧିଲା

ଶିଳାପରେ ନେଇ କନ୍ୟା ଫିଙ୍ଗିଦେଇ

ଶୁନ୍ୟ ବାଣୀ କର୍ଣ୍ଣ ତ୍ୱରିତ ଶୁଣଇ ll

ଶୂନ୍ୟରେ ବଢ଼ୁଛି ଶତ୍ରୁ ଗୋପପୁରେ

ଅଧର୍ମର ନାଶ କରିବ ମହୀରେ

ଯଦି ପାରୁ ଯାଇ କର ତାକୁ ବଧ

ନୋହିଲେ ଛେଦିବ ତୋର ଶିର ସ୍କନ୍ଧ ll

ଶୁଣି ଶୂନ୍ୟ ବାଣି କଂସ ତତକ୍ଷଣି

କେଶୀ, ବକା, ଅଘା କେତେ ଅସୁରୁଣୀ

ବାଳହତ୍ୟା ଅପରାଧେ ଲିପ୍ତ ହୋଇ

ମରଣ ଫାନ୍ଦ ତା ଆସୁଛି ଘନେଇ ll