ଅସମ୍ଭବ କିଛି ନାହିଁ
ଅସମ୍ଭବ କିଛି ନାହିଁ
#ସିଧାକଥା - ୧୦୦
ମଣିଷ ନିଜକୁ ନ୍ୟୁନ ମନେକଲେ ଆଗେଇ ପାରିବ ନାହିଁ,
ଅଧମ ଅକ୍ଷମ ଦୁର୍ବଳ ନିଜକୁ ମୂର୍ଖ କହିବନି କେହି |
ମୋ ମନରାଜ୍ୟର ରାଜା ମୁହିଁ ଜଣେ ମୋ କ୍ଷେତ୍ରରେ ମୁହିଁ ଶ୍ରେଷ୍ଠ,
କାହାରି ଦୟାରେ ବଞ୍ଚିଛି କହିଲେ ତାହାଦେବ ଦିନେ କଷ୍ଟ |
ପ୍ରକୃତି ସୃଷ୍ଟିରେ କେହି ଛୋଟନୁହଁ ଅଲୋଡ଼ା କିଛି ନଥିବ,
ବୁଦ୍ଧି ଜ୍ଞାନ ବଳ ବଞ୍ଚିବା କୌଶଳ ପାଇଛନ୍ତି ସବୁଜୀବ |
ଶିକ୍ଷାରେ ଦୀକ୍ଷାରେ ଦୁର୍ବଳ ଥାଇ ବି ହେଇଛନ୍ତି ସୁପୁରୁଷ,
ପଙ୍ଗୁ ଖର୍ବକାୟ ଅନାଥ ହେଲେ ବି ଅର୍ଜିଛନ୍ତି କୀର୍ତ୍ତି-ଯଶ |
ବୃଦ୍ଧ ବୟସରେ କଲମ ଚଳାଇ ହେଲେ ଜଣେ ବ୍ୟାସକବି,
ରୋଗରେ ପୀଡ଼ିତ ଫତୁରାନନ୍ଦ ବି ଆଙ୍କିଦେଲେ ହାସ୍ୟଛବି |
ବଣ ମୁଲକରେ ଲକ୍ଷ୍ମଣ ନାଏକ ରଖିଲେ ଜାତିର ଟେକ,
ଅସମ୍ଭବ କିଛି ନାହିଁ ଏ' ଜଗତେ କହିବା ଉଠାଇ ବେକ |