ଅସଲି ନକଲି
ଅସଲି ନକଲି
ଅସଲି ନକଲି ରୂପ ଏକାଭଳି
ସହଜେ ହୁଏନି ଚିହ୍ନି
ଫସିଗଲେ ଥରେ ନକଲି ପ୍ରେମରେ
ଭାଗ୍ୟେ ଉଦେ ହୁଏ ଶନି ।
ରହିବା ନକଲି ଖାଇବା ନକଲି
ନକଲି ନିଜ ଚରିତ୍ର
କଥାରେ ନକଲି କାମରେ ନକଲି
ନକଲି ସାରା ଜଗତ ।
ଲୋକେ ତ ନକଲି ନେତା ତ ନକଲି
ଅସଲି କେଉଁଠି ନାହିଁ
ନକଲିର ଠାଵ ନକଲି କରଇ
ନକଲି ସମ୍ମାନ ପାଇଁ ।
ଜାଣେ ସରକାର ଜାଣେ ଅଫିସର
ନକଲି ଦ୍ରବ୍ୟ ଉତ୍ପତି
ପଣି ପାଇ ସେଠୁ ନିଦୁ ଉଠୁ ଉଠୁ
କେତେ ବର୍ଷ ଯାଏ ବିତି ।
ଲୋକ ଦେଖାଣିଆ ଚଢ଼ାଉରେ ବଣା
ସାମ୍ବାଦିକ ଉପଭୋକ୍ତା
ଗଣ ମାଧ୍ୟମରେ ମୁଖ୍ୟ ଖବରରେ
ହୁଏ ତାହା ମୁଖ୍ୟ ବାର୍ତ୍ତା ।
ଜେଏଲ ଯାଉଛି ଟଙ୍କା ଫୋପାଡ଼ୁଛି
ଦୋଷରୁ ନିର୍ଦୋଷ ହୁଏ
ଫେରିଆସି ପୁଣି ସବୁ ଜାଣି ଶୁଣି
ନକଲି ଧନ୍ଦା କରାଏ ।
ସେ ବାର୍ତ୍ତା ରୁହଇ ସେହିଠାରେ ଭାଇ
ଥିଲା ତାହା ପ୍ରହସନ
ନକଲି ଜାଗାରେ ନକଲି ରହିଛି
ପୁଣି ହୁଏ ଉତ୍ପାଦନ ।
ଆଇନ ନକଲି ହାକିମ ନକଲି
ବିଚାର ହୁଏ ନକଲି
ଲଭି ଏତେ ଦଶା ନକଲି ଫାଶଟା
ହୁଏନି କେବେ ଅସଲି ।
ଆଇନଟା ଏଠି ହୁଗୁଳା ସବୁଠି
ହୁଗୁଳା ବି ପ୍ରଶାସନ
ନିଜ ସ୍ୱାର୍ଥ ପାଇଁ ବଳିତ ପଡଇ
ଅସଲି ଚେହେରା ମାନ ।