ଅପାରଗତାର ଚିତ୍ରପଟ୍ଟ

ଲୀଳାମୟ ମହାପ୍ରଭୁ ଶ୍ରୀଜଗନ୍ନାଥଙ୍କ ଇଚ୍ଛାର ବାହାନାରେ

ନୁହେଁ କି ଏଇ ତୁମ୍ଭ ଚରମ ଅପାରଗତାର ପ୍ରମାଣ

ନୁହେଁ କି ଏକ କଳଙ୍କିତ ଅଧ୍ୟାୟର ଅୟମାରମ୍ଭ

ନୁହେଁ କି ଜାତିର ଅସ୍ତିତ୍ବ ଅସ୍ମିତା ମର୍ଯ୍ୟାଦାର ପ୍ରଶ୍ନ ?

କାହିଁ ପାଇଁ ପ୍ରତିଥର ଏପରି ଛଳନାପୂର୍ଣ୍ଣ ବୃଥା ପ୍ରହସନ

ଆନ୍ତରିକତା ବିହୀନ ସେବା ପୂଜାର ନିଷ୍ଫଳ ଆୟୋଜନ

କଳାପାହାଡ଼ ଗଣ କେତେ ରୂପ ତୁମ କେତେ ଭିଆଣ

ନବକଳେବର ବ୍ରହ୍ମ ବିଭ୍ରାଟ ଠୁ ରଥଯାତ୍ରା ବନ୍ଦର ଷଡଯନ୍ତ୍ର !

ଯେଉଁ ଆଇନର ଦ୍ବାହିରେ ପଛକୁ ଫେରାଇ ନେଇଛ ପାଦ

ତୁମ୍ଭେ କେତେ ଯେ କର ତାହାର ଶୁଦ୍ଧାନ୍ତକରଣେ ପାଳନ

କେଡ଼େ ନ୍ୟାୟବନ୍ତ ତୁମ୍ଭେ ଧନ୍ଯ ତୁମ୍ଭ ନିତୀ ସ୍ଵଚ୍ଛ ଶାସନ

ହିସାବ ରଖିଛି ଏଇ ଜାତି ଇତିହାସ ତାର ମୁକସାକ୍ଷୀ !

ଶ୍ରମଜିବୀ ଯେବେ ଚାଲୁଥିଲା ବେଦନାରେ ବାଟ 

କ୍ଷଣ କ୍ଷଣ ଭୋଗୁଥିଲା ଅକୁହା ଅସରନ୍ତି କଷ୍ଟ

ତୁମ୍ଭେ ତ ଥିଲ ସେବେ କୁମ୍ଭକର୍ଣ୍ଣ ସମ ନିଦ୍ରାଗତ

କାହିଁକି ନଥିଲ କୁହ ସେପାଇଁ ତିଳେ ବି ଚିନ୍ତିତ ?

ଗୁରୁ - ଗ୍ରନ୍ଥ - ଗଜପତି - ଗୋବିନ୍ଦଙ୍କ ସାଂସ୍କୃତିକ

ମାମଲାରେ ହସ୍ତକ୍ଷେପ କରିବାକୁ କିଏ ଏହି ସରକାର

କୋଟି କୋଟି ଶ୍ରଦ୍ଧାଳୁ ଭକ୍ତଙ୍କ ଧାର୍ମିକ ଅଧିକାର

ଭାବାବେଗରେ କାହିଁକି ଏ କୁଠାର ପ୍ରହାର ?

ସୁବିଧାବାଦୀ ତଥାକଥିତ ବୁଦ୍ଧିଜୀବୀ ଗବେଷକ

ଯେତେ ସାଜି ସରକାରୀ କଳର ବଚସ୍କର

ବଖାଣନ୍ତି ଅଯୌକ୍ତିକ ଅଯଥା ତର୍କ ଅବାନ୍ତର

ଇତିହାସର ତର୍ଜମା ତାଙ୍କର ଅଟଇ ବିଭ୍ରାନ୍ତିକର !

ତୁମ୍ଭକୁ ଧିକ୍କାର ଶତ ବାର ସହସ୍ର ବାର

ତୁମ୍ଭେ ଅପାରଗ ସ୍ଥାଣୁ ପଙ୍ଗୁ ଅଥର୍ବ ସରକାର

ତୁଛା କ୍ଷମତାର ଦର୍ପେ ହୋଇଣ ଅହଂକାରୀ

ଆପଣା ପାଦରେ ତୁମ୍ଭେ ମାରିଛ କୁରାଢ଼ି !