ଅନୁତାପ

ଅନୁତାପ ଓ ଅନୁଭବ

ମୁଦ୍ରାର ଦୁଇପାର୍ଶ୍ୱ

ଏକକୁ ଆରେକ

ବେଶ୍ ଦୃଢ଼ ରଜ୍ଜୁରେ

ଛନ୍ଦାଛନ୍ଦି 

ସତେକି ଜାଆଁଳା ଫଳ

ଆଉ 

ନିର୍ଦ୍ଦିଷ୍ଟ ମୂଲ୍ୟାୟନରେ 

ଗଢା ତାର ପୂର୍ଣ୍ଣାଙ୍ଗ ଶରୀର 

ସତେକି ଘନିଷ୍ଠ ସହଯୋଗୀ

ଉଭୟଙ୍କ ମୂଲ୍ୟାୟନ ଭିତରେ ।

ଅନୁଭବ ଆସିଯାଏ

ଏକ ଅଜଣା ମୁହୂର୍ତ୍ତରେ

କ୍ଷଣିକ ଉତ୍ତେଜନା ସୃଷ୍ଟି

ଭୁଲିଯାଏ ସବୁ ସମ୍ପର୍କ

ଭୁଲିଯାଏ ବର୍ତ୍ତମାନ ଓ ଭବିଷ୍ୟତ

ଭରିଯାଏ ଶୀତଳ ପ୍ରକମ୍ପ 

ଶରୀରେ ପ୍ରତ୍ୟେକ ଶିରାରେ

ଉଷ୍ମତା ବଢିଯାଏ

ରକ୍ତ ଓ ମାଂସରେ ।

ଧିରେ ଧିରେ ଆସେ ଅନୁତାପ

ତାର ସାଙ୍ଗ ସାଥି

ବନ୍ଧୁଗଣ ଧରି

ଶିଥିଳ ହୋଇଯାଏ ରକ୍ତ

ଅବଶ ହୋଇଯାଏ ଦେହ

ଭୁଲ ହୋଇଥିବା ସ୍ମୃତିକୁ

ରୋମନ୍ଥନ କରିବା ପାଇଁ

ଗୁପ୍ତଚର ସାଜି ଛଦ୍ମବେଶେ

ମୋ ଇତିହାସ ଉଦଜ୍ଜିବୀତ ହୁଏ

ପୁରୁଣା ପୃଷ୍ଠାରୁ ।

ଗୁମାନ ଭାଙ୍ଗିଯାଏ

ଗୁମୁରି ଉଠେ ଅତୀତ ଜିଜ୍ଞାସା

ଗୁଦୁଡି ଘୋଡେ଼ଇ ହୋଇ

ହେଜି ହେଜି ଗୋଇ କଥା

ଗୁରୁ ଚଣ୍ଡାଳ ଦୋଷରେ

ସମୟ ବିତିଯାଏ

ଗର୍ଗରୀର ମୃଦୁ ଝଙ୍କୃତ ଭଲି

ପିଆଲାର ଅବିଶ୍ୱାସୀ

ରଙ୍ଗୀନ ନୃତ୍ୟରେ ।

ଅତଃପର,

ଅନୁତାପର ଝଙ୍କୃତରେ

ଅତଡା ମୋ ଖସିଯାଏ

ମୋ ବନ୍ୟା ପ୍ଳାବିତ ନଦୀରେ

ଦୁଇ ପାର୍ଶ୍ୱୁ 

କୋମଳ ମାଟି ପରି

ଅତୃପ୍ତ ଆତ୍ମାଟା

ବିକଟାଳ ରଡି ଛାଡେ

ଅମାବାସ୍ୟାର ଅମା ଅନ୍ଧକାରରେ

ସତେକି ପାଗଳ ଶୃଗାଳବତ୍ ।

ଜଳିଯାଏ ମୁଁ

ଅନୁତାପର ଅନଳ ବହ୍ନିବଳୟରେ

ହଜିଯାଏ ସତ୍ତା ମୋର

ଖୋଜି ବୁଲେ ସ୍ମୃତି

ଭୁଲ ଆଉ ଠିକ୍

ସତ ଆଉ ମିଛ

ପାପ ଆଉ ପୂଣ୍ୟର

ସପ୍ତବ୍ୟୁହ ଅଶାନ୍ତ ଝଡରେ

କିଏ ଠିକ୍

ସେ ଓ ମୁଁ

ନା

ଅନୁଭବ ଓ ଅନୁତାପ

ଶଦ୍ଦର ମଧ୍ୟରେ ।