ଅନୁରାଗ ବୁଣି ଆସିଛି ଶୀତ

 ପ୍ରକୃତି ଦେଇଛି ଧରା ଦେହ ଛୁଇଁ

   କେତେ ଅନୁଭବ ପୁଲକେ ଭରା 

ମନ ହଜିଯାଏ ମୋହନ ରୂପରେ

   ଦୂର ହୋଇଯାଏ ହୃଦୟ ଭାରା |

ଅନୁରାଗ ବୁଣି ଆସିଛି ଯେ ଶୀତ

   ଶିଶିରେ ଶିଶିରେ ପକାଇ ପାଦ 

ସକାଳ କୁହୁଡି ସୂରୁଜ ଘୋଡ଼ାଇ

   ଭରିଦିଏ ଦେହେ ଶୀତର ସ୍ୱାଦ |

ଘର ଅଗଣାରେ ଗେଣ୍ଡୁଫୁଲ ହସେ

   କଅଁଳ ଖରାରେ ହଳଦୀ ମାଖି  

ତୁଳସୀ ମୂଳରେ କୁଆଁରୀ ହାତର

   ରଙ୍ଗ ମୁରୁଜରେ ଲାଖଇ ଆଖି |

ପଞ୍ଚୁକ ବୁଡ଼ରେ ଓଦା ପଣତରେ

   ଧୀର ସମୀରଣେ ଶିହରେ ଦେହ 

ମନ ଖୋଜୁଥାଏ ଉଷୁମ ପରଶ

   ପାହାନ୍ତି ଶେଜର ଅନ୍ତିମ ସ୍ନେହ |

ମାର୍ଗଶୀର ମାସ ଗୁରୁବାର ପାଇଁ

   ସୀମନ୍ତିନୀ ହୁଏ ଚଳ ଚଞ୍ଚଳା 

ଦାଣ୍ଡ ଦୁଆରକୁ ଗୋବରରେ ଲିପି

  ଚିତା ପକାଏ ଯେ ନକରି ହେଳା |

ମାଣବସା ଲକ୍ଷ୍ମୀ ପୂଜା ଘରେ ଘରେ

   ସଞ୍ଜେ ପଢ଼ାହୁଏ ଲକ୍ଷ୍ମୀପୁରାଣ 

ଭକ୍ତିଭରେ ପୂଜା କରେ ସୁଲକ୍ଷଣୀ

   ଯତନେ ବସାଇ ଧାନର ମାଣ |

ମାଆଙ୍କ ଆଶିଷେ ପୂର୍ଣ୍ଣ ହେବ କୋଠି

   କ୍ଷେତରୁ ଆସିବ ସୁନା ଫସଲ 

ଚାଷୀ ମୁହେଁ ହସ ଭରିଛି ଯେ ଶୀତ

   ଅନୁରାଗେ ହେବ ଭଲ ଅମଳ |