ଅନୁଗ୍ରହ
ଅନୁଗ୍ରହ
ନାହଂ ତିଷ୍ଠାମି ଵୈକୁଣ୍ଠେ ୟୋଗିନାଂ ହୃଦୟେ ନଚ ହଂ
ମଦଭକ୍ତାଃ ଯତ୍ର ଗାୟନ୍ତୀ ତତ୍ର ତିଷ୍ଠାମି ନାରଦଃ।🙏
ଆତ୍ମୀୟତାହୀନ ଆତ୍ମୀୟ ସ୍ୱଜନ
ଅବସାଦ ଘେରାପ୍ରାଣ,
ଅନୁଗ୍ରହପୂର୍ଣ୍ଣ କର ଏ ଜୀବନ
ବିଷାଦରୁ ପରିତ୍ରାଣ ।
ଜୀବନ ପ୍ରଦୀପ ଲିଭି, ଲିଭି ଆସେ
ଆତ୍ମାର ଶବଦ ଯନ୍ତ୍ରେ ,
ଏ ଘୋର ଅନଳ ଯନ୍ତ୍ରଣା ବିଶେଷେ
ନାମ ମହଷୌଧି ମନ୍ତ୍ରେ ।
ତୁମ ନାମେ ବାହି ଜୀବନ ନଉକା
ନାମ ଧନେ ଗଣ୍ଠିକରି,
ସମ୍ବଳ ପଣତେ ସେ ଧନ ସଉଦା
ଶେଷେ ଯିବି ବାନ୍ଧିକରି ।
କାଳକୁଟ ଏହି ସଂସାର ଯନ୍ତ୍ରଣା
କୋହର ଅଠର ନଳା,
ଶାନ୍ତିର ବେଦୀରେ ମୋ ଦିବ୍ୟଭାବନା
ତପସ୍ୟା, ତ୍ୟାଗର ଶିଳା ।
ତୁମେ କରୁଣାର ଅସରା ବାରିଧି
ମୋ ଗହନ ଅନୁଭବ,
ମନ ମରୁବାଲି ବିଳପିତ ଶାରୀ
ଅନନ୍ତ ସୁଧାର ଭାବ ।
ତୁମେ ମହାବାହୁ ଦୀନ ଅଧମ ମୁଁ
ଚରଣାଶ୍ରିତ ଆଶ୍ରିତ,
ସମର୍ପିତ ପ୍ରାଣ କର ହେ ଆପଣ
ତୁମଠାରେ ହୃଦ ସ୍ଥିତ ।
ଅମୁଲ୍ୟ ବିଭବ ଆହେ ନୀଳଶୈଳ
ଆରତେ କରେ ଗୁହାରି,
ତୁମେ ଏକା ସତ୍ୟ ଏ ମିଛ ନିଳୟ
ଦିଅ ଭାବ ଅସୁମାରି ।
ବିଶ୍ୱାସର ଶୁଦ୍ଧ ଶାଳଗ୍ରାମ ଆଜି
ହୃଦୟେ ସାଇତି ଅଛି,
ଯେତେ ଝଡ଼,ମୋଡ଼ ଜୀବନରେ ଝାଞ୍ଜି
ହସି, ହସି ସହୁଅଛି ।
ବୈକୁଣ୍ଠରେ ନାହଁ ଭାବ ଦରବାରେ
ନାମମୂଳେ ତୁମ ବାସ,
ଯୋଗୀ ନୁହେଁ ମୁହିଁ ଏହି ସଂସାରରେ
ଭଜୁଛି ହେ ନାମରସ ।
ଆସଥରେ ମୋର ହୃଦୟ ନିବାସୀ
ହୃଦ ତୁଳସୀ କାନନେ,
ପ୍ରତି ରେଣୁ ପରେ ନାମ ରହିଅଛି
ଦିବ୍ୟ ସ୍ପର୍ଶ ଆଲିଙ୍ଗନେ ।
ପତିତପାବନ ମୁଁ, ଛାର ଅଧମ
ଜୀବନ ସମର୍ପି ପଦେ,
ରଖିବା, ମାରିବା ଇଚ୍ଛା ଆହେ ତୁମ
ନିଅ ହରି ହୃଦଗତେ ।
ଭାବର ଭିକାରି ସାଜିଛି ସ୍ୱୀକାରୀ
ନାହିଁ ଅନ୍ୟ କିଛି ଆଶ,
କେବଳ ସମ୍ପତ୍ତି ନାମର ବିଭୁତି
ମୁଁ 'କାର ଏଠି ବିବଶ ।