ଅନନ୍ୟ ଗ୍ରହ

ଗ୍ରହ ଙ୍କ ମଧ୍ୟରେ ଅଟେ ସର୍ବୋତ୍ତମ

ଅନନ୍ୟ ଅଟେ ମୋ ଧରଣୀ ମାତା,

ଖଞ୍ଜି ରଖିଅଛି କେତେ ଯେ ଦରବ

ସନ୍ତାନ ଙ୍କ ପାଇଁ ସଦା ତା ଚିନ୍ତା ।। ୧

ଏମିତି ଗ୍ରହଟେ ଅଛି କି ବ୍ରହ୍ମାଣ୍ଡେ

ଜୀବ ସତ୍ତା ଯହିଁ ଏତେ ଉନ୍ନତ,

କୀଟୁ ବ୍ରହ୍ମ ଯାଏଁ ସମସ୍ତ ଙ୍କ ପାଇଁ

ଗଚ୍ଛିତ ରହିଛି ଯେଉଁଠି ଖାଦ୍ୟ ।। ୨

ପବନ ଯେଉଁଠି ଜୀବନ ସଞ୍ଚରି

ପ୍ରବାହିତ ହୁଏ ସର୍ବତ୍ର ପୂରି,

ଜଳ ଯେଉଁ ଠାରେ ଅମୃତ ଧାରାରେ

ସଞ୍ଜିବିତ କରେ ପ୍ରାଣ ସବୁରି ।। ୩

ସୂର୍ଯ୍ୟ ଦେବ ନିତି ପ୍ରତି ଉଦେ ହୋଇ

ଶକ୍ତି ଯୋଗାଣରେ ଥାନ୍ତି ତତ୍ପର,

ଚନ୍ଦ୍ର ଦେବ ପୁଣି ପ୍ରତି ରଜନୀ ରେ

ବରଷା କରନ୍ତି ଅମୃତ କର ।। ୪

ଯେଉଁଠି ପାଷାଣ ଜନ୍ମ ଦେଇ ନଦୀ

ଜଗତ ପାଳଇ ବିତରି ଜଳ,

ପାଦପ ଯେଉଁଠି ସଦା ହସି ହସି

କରୁଥାଏ ଜଗତ ର ମଙ୍ଗଳ ।। ୫

କ୍ରମିକ ଭାବରେ ଆସେ ଯେଉଁ ଠାରେ

ବର୍ଷ ଋତୁ ମାସ ସପ୍ତାହ ଦିନ,

ଶୁକ୍ଳ ପକ୍ଷ ପରେ କୃଷ୍ଣ ପକ୍ଷ ହୁଏ

ଚନ୍ଦ୍ର ଙ୍କ କ୍ରମିକ କ୍ଷୟ ବର୍ଦ୍ଧନ ।। ୬

ଋତୁ ଜାଣି ଯହିଁ ଅନୁଭୂତ ହୁଏ 

ଖରା ବର୍ଷା ଶୀତ କ୍ରମିକ ଭାବେ,

ଜୀବ ଜଗତ ର ଆବଶ୍ୟକ ଯେତେ

ନିଅଣ୍ଟ ହୁଏନି ଯେଉଁଠି କେବେ ।। ୭

ସ୍ଵର୍ଗ ଠୁ ସୁନ୍ଦର ଅତି ମନୋହର

ଫଳ ପୁଷ୍ପ ଭରା ରମ୍ୟ କାନନ,

ପଶୁ ପକ୍ଷୀ ଙ୍କର ସୁମଧୁର ସ୍ବର

ବିଭୋର କରଇ ଯେଉଁଠି ମନ ।। ୮

ବିଶାଳ ସାଗର ଗାରିମା ଯାହାର

ବାଷ୍ପ ହୋଇ ନୀର ସୃଜଇ ମେଘ,

ସେହି ତ ମୋହର ଅତି ଆପଣାର

ବସୁମତୀ ମାଆ ଅଟେ ଅନର୍ଘ ।। ୯

ଅନନ୍ୟ ଅଟଇ ସବୁ ଠାରୁ ସିଏ

ଅନନ୍ୟ ଅଟେ ତା ସୃଷ୍ଟି ସମ୍ଭାର,

ଧନ୍ୟ ସେ ବିନ୍ଧାଣୀ ଧନ୍ୟ ତା କରଣୀ

ପ୍ରଣମେ ତାହାଙ୍କୁ ମୁଁ ବାରମ୍ବାର ।। ୧୦