ଅନ୍ଧ-ବିଶ୍ୱାସ-କଳଙ୍କ

ଆମ ଏ' ସମାଜ ପୀଡ଼ିତ ହୋଇଛି ଅନ୍ଧ-ବିଶ୍ୱାସରେ ଛନ୍ଦା,

କୁସଂସ୍କାର ଆଉ ଡାହାଣୀ ନାମରେ ନିରୀହ ପାଉଛି ନିନ୍ଦା |

ଅଦା ଲଗେଇଲେ ପଦାହେବ କୁଳ ବାଉଁଶରେ ବଂଶ ନାଶ,

ନଡ଼ିଆ ଗଛକୁ ଲଗେଇବ ଯିଏ ତା'ର ଘରହେବ ଧ୍ଵଂସ |

ବିଲେଇକୁ ଦେଖି ଘରୁ ବାହାରିଲେ ଦୁର୍ଘଟଣା ହେବା ଥୟ,

ପେଚା ରାବଦେଲେ ମରିବ ମୁରବି ଜଗାନ୍ତି ମିଛରେ ଭୟ |

ଶାଗୁଣା ବସିଲେ ଉଚ୍ଚ ଚାଳଦେଖି ଅଶୁଭ କହନ୍ତି ଥୋକେ,

କୁକୁର ରଡ଼ିଲେ ବିପଦ ଆସୁଛି କହନ୍ତି ଅଜ୍ଞାନ ଲୋକେ |

 

କାଳିଆ ବ୍ରାହ୍ମଣ ଦର୍ଶନ ଅଶୁଭ ଝିଟିପିଟି କହେ ସତ, 

ବିବାହ ନକରି ମରିଯାଏ ଯିଏ, ସିଏ ହୋଇଥାଏ ଭୂତ |

ଦୁର୍ବଳମନା ଯେ ଅତି ସହଜରେ ଗ୍ରହଣ କରେ ସେ କଥା,

ସବୁମିଛ ପୁଣି କପଟରେ ଭରା ସମାଜ ପାଇଁ ଏ' ବ୍ୟଥା |

ଆମରି ତିଆରି ଯାନ ମଙ୍ଗଳରେ ପହଞ୍ଚି ପାରିଲା ଯାଇ,

ତଥାପି ବିଜ୍ଞାନ ମଣିଷ ମନରୁ କଳଙ୍କ ପାରୁନି ଧୋଇ |