ଅଲାଜୁକ ମୁହେଁ ଖଡ଼ାଗଛ

ଅଲାଜୁକ ମୁହେଁ ଖଡ଼ାଗଛ

ଗୁଜୁରାତି ଚୋପା ବାଟରୁ ଗୋଟେଇ

ଖାଇଥିଲା ବୋଲି କହେ ମିଛ

ଅଲାଜୁକ ମୁହେଁ ଖଡ଼ାଗଛ

ମାନ ପଛେ ନାହିଁ ମାନପତ୍ର କିଣି

ଗଳା ଝୁଲା ଆହା ବଡ଼ ସ୍ବଚ୍ଛ

ଅଲାଜୁକ ମୁହେଁ ଖଡ଼ାଗଛ

ବାରନାରୀ ଧରି ବର ନାରୀ କହେ

ଖୋଲା ମେଲା ପ୍ରେମ ଭଲ ବାଛ

ଅଲାଜୁକ ମୁହେଁ ଖଡ଼ାଗଛ

ପୂଜା ଧ୍ବଜା ପାଇଁ କେତେ ଛନ୍ଦ ଜାଣେ

ଗୋଡ଼ ଧରା ଧରି ଆଗ ପଛ

ଅଲାଜୁକ ମୁହେଁ ଖଡ଼ାଗଛ

କୁମ୍ଭୀର କାନ୍ଦଣା ବଢ଼ିଆ ଜାଣିଛି

ଲୁହ ଡବ ଡବ ଆଖି ପୋଛ

ଅଲାଜୁକ ମୁହେଁ ଖଡ଼ାଗଛ

ମନକୁ ମନ ତ ସୁନ୍ଦର ନାଚୁଛି

ନଚାଉଛି କାଳେ କେକା ପୁଛ

ଅଲାଜୁକ ମୁହେଁ ଖଡ଼ାଗଛ

ଶତ୍ରୁକୁ ଦେଖିଲେ ପିଳେହି ପାଣିଟା

ବୀର ବୋଲି ଆଡ଼ା ଖାଡ଼ା ମୁଛ

ଅଲାଜୁକ ମୁହେଁ ଖଡ଼ାଗଛ

ଘର ଚୁଲି ପଛେ ଧଣ୍ଡ ଶୋଇଥାଉ

ଖିଆ ଉଚ୍ଚା ବୋଲି ତୁଣ୍ଡ ତୁଛ

ଅଲାଜୁକ ମୁହେଁ ଖଡ଼ାଗଛ

ମୀନ ଦଣ୍ଡକିରୀ ଉପରେ ଡିଅଁନ୍ତି

ତୁନିଥାଏ ଦେଖ ରୋହି ମାଛ

ଅଲାଜୁକ ମୁହେଁ ଖଡ଼ାଗଛ

ଚୂନ କାଳି ବୋଳି ଜୋତାମାଳ ପିନ୍ଧା

ଲୋଡ଼ାନାହିଁ ତା'କୁ ସଜ ଗୁଚ୍ଛ